من سنتين سافرت القاهرة عشان اشتغل. كنت مغتربة ومفيش في حياتي غير شغلي بس. اتعرفت على شاب معايا في الشغل وهو اعترفلي أنه بيحبني جدا وعايز يخطبني. بعدها باقل من سنة اتخطبنا وهو سافر دولة عربية يشتغل. هو كان بيشجعني اني اسيب الشغل وارجع اعيش مع اهلي لان الشغل كان ضاغطني جدا وكنت وحيدة جدا في القاهرة لوحدي. ففي الاخر سيبت الشغل ورجعت بيت اهلي. هو كان كويس معايا معظم الوقت بس اكبر عيب فيه أنه مش بيهتم بحاجات كتير. مع العلم أنه يقدر لانه عايش وبيشتغل برة. انا كنت معرفاه ظروف عيشتي في بيت اهلي وان السبب الرئيسي اللي خلاني اسيبهم واروح اشتغل في القاهرة هو الظروف المادية الصعبة جدا. انا عيشت في الظروف دي طول حياتي عشان كدة اتعودت اعتمد على نفسي واشتغل كتير، بس هو قالي ارجعي بيت أهلك وانا في ضهرك. انا معاكي لو احتاجتي اي حاجة. بس اللي لقيته دلوقتي هو العكس. مش بيهتم أنه يحاول يساعدني باي شكل. حاسة اني مش مخطوبة ولا كان في اي حد بيحبني. هو تقريبا متوقع مني اني اطلب بس انا مش بقدر. وقولتله كتييير اني بتكسف اطلب اي حاجة، وهو لسة مقتنع اني لو احتجت حاجة هروح اطلب منه. اللي زعلني هو أنه شافني بمر بظروف صعبة جدا. اشتغلت مع شركة من البيت ونصبوا عليا ومخدتش اي مرتب بعد شغل شهور، وتعبت تعب جامد جدا وكل الفلوس اللي كنت محوشاها اتصرفت على العلاج و الكشوفات.. وهو لحد دلوقتي محاولش باي طريقة أنه يبادر من نفسه من غير ما انا اللي اطلب منه. مع أني حكيتله كل الحاجات دي. يعني هو عارف بس مش بيعمل حاجة بحجة أنه مستنيني اطلب. الموضوع قد يبان مادي بس هو محسسني اني مليش قيمة عنده أنه يحاول يفرحني أو يتأكد اني مرتاحة من غير ما اطلب انا. بيحسسني بعدم الامان واني خايفة اسافر معاه بعد ما نتجوز واحط حياتي كلها بين أيديه. بيحسسني اني اقل من البنات التانية لاني مش لاقية حد يهتم بيا زيهم. ساعات بخاف اكون ظلماه وان انا اللي غلطانة، بس ساعات تانية بقول اللي حابب يساعد حد بيعمل كدة من نفسه من غير ما حد يطلب منه. لانه حابب كدة. فانا مش عارفة اعمل ايه. انا حبيته اوي في الاول بس دلوقتي حاسة ان مشاعري بدأت تتبلد واني خايفة. مش عارفة اعمل ايه. اكمل ولا امشي؟ ولا اتكلم معاه؟ ولو اتكلمت اقوله ايه؟ اسفة لو طولت عليكم💔

2

8