عارف المشكلة ف ايه، ان الحاجات الطبيعية البسيطة مش بتحصلك وان غصب عنك بتشوف انها بتحصل للناس التانية هي حاجات طبيعية بس حاسس انها معجزة بالنسبالك، يمكن لانك عظمتها في قلبك فبتوصل لمرحلة تحس انك متستحقش او اتنسيت او ان كل حاجة اتوزعت ومفضلش ليك حاجة، كلامي ملهوش علاقة بقدرة ربنا وتوزيع الارزاق لكن انا بعبر عن شعوري بشكل مجرد مش بقول ان الى حساه حقيقي بس انا حساه، ساعات بحخاف اصلا ان لما يحصلى الحاجة الى بتمناها انى افشل يمكن اتحرمت منها عشان مش هنفع، بس منفعش ليه؟! ليه ممكن إنسان مينفعش انه يتحب يتحب بشكل يملى كيانه امان يتحب بكل معنى للأمان، عارف لما بتشوف حد جزء من جسمه مبتور انا بحس الشعور دا ف روحي كأن جزء منها مبتور وف مكان تانى حاجة ناقصة فيا مش عارفة اعيش من غيرها بس مش عارفة هي فين، الجزء المبتور مش اى حد مينفعش يكون اى حد هو جزء ربنا بس يعرفه وشايفه، ساعات بقعد اكلم ربنا اقوله يارب انا عارفة انى مستاهلش وانك مغرقني نعم لكن فيه جزء منى حزين مش عارفة اكمل مش عارفة انجز حاجة غصب عنى مش كسل بعمل حاجات كتير بس نفسي ابذل كتير لله ولأخرتى عارفة انى بضيع وقت كتير في الحزن والسرحان بس انا فعلا بحس ان جسمي ميت بقيت مش بركز في الكلام وساعات وانا بتكلم انسي باقي الجمله او لسانى فجاة احس انه تقل للحظات انا عارفة يارب ان كل دا بأجر وانا اسفه انى حزينة انا راضية ومبحاولش اكمل نقص روحي بأى جزء وانك عالم انه من جوا جوا قلبي انا متجردة ليك ومش عايزة غير إختيارك ساعات بحس انه موجود والأمل دا لوحدة بيكفيني وساعات بحس انه لا وسط كل الناس دي ماليش حد كأنى وقفة وسط ناس كتير كل حد فيهم بيجي شخص تاني يسمك ايده ويمشي كلهم مشوا كلهم انا عاملة زي ما فيروز قالت"قديش كان في ناس ع المفرق تنطر ناس وتشتى الدنى ويحملوا شمسية وأنا بإيام الصحو ما حدا نطرني"

3

0