انا حزينة جدا.. اللون الاسود طلع مش اسود وبس لكن له درجات اغمق واغمق .. انا كنت مقررة أبطل أكتب هنا بقالى فترة ومسحت الأكونت وانى هحاول أتعايش مع الواقع لان وجودى هنا خلانى حد بيشتكى كتير مش بدور ع حل ع اد م انا عايزة اشتكى واحكى وحد يسمعنى.. بس حصلت حاجة وحشة اوى مش حاجة حصلت ليا حصلت لحد عزيز عليا من أهلى.. ونفس الحاجة دى حصلتلى كتير وبتحصل لبنات محترمة كتير و من كتر م بتحصلنا بقينا بنخاف نخوض اى تجربة جديدة... مواضيع بيكون شكلها حلو اوى من برا ونقول خلاص العوض جه بس هو بيكون خبية أمل كبيرة .. ليه بقيت بحس ان رجالة كتير مبقتش بتتقى الله ولا بتفكر بشكل سليم .. ومحدش عايز يمشي بالأصول.. والحلال والحرام بقوا موضة قديمة .. انا اعرف كمية بنات آية ف الدين والاخلاق والعلم والأصل الطيب بيقوا فى نوعيات من الرجالة ع شكل أمراض نفسية الموضوع بيكون لطيف جدا ف الاول لانه اصلا في إطار شرعى م يمسى *زواج صالونات*اظن مفيش حاجة محترمة اكتر من كدا بحس ان شريحة كبيرة من الرجالة بقوا مرضى نفسيين وبيختاروا البنات دى بالذات عشان يطلعوا عليهم امراضهم ويتسببولهم ف تروما وبعدين يمشوا والبنت تسأل نفسها انا ايه الغلط الى فيا ..ليه من الاول والمشكلة ان النوعية دى من البنات مش بتقبل بأى علاقات الا في إطار شرعى وبناءا عليه يجي حد يتقدم وتبقى الدنيا كويسة جدا ومبهور بيها وفجأة يبقى عايز يغيرها يعنى لو البنت بتدرس بتعمل ماجستير مثلا او بتشتغل هو عايزها تقعد لو قاعدة ف البيت عايزها تشتغل المهم هغيرك وهعملك حالة إرتباك وأحسسك ان فيكي حاجة غلط .. ويفضل يعلق ع اسلوب حياتها ومواعيد دخولها البيت وكأن هى أهلها مربوهاش وكانوا مستنيين العريس المنتظر يجي يربيها انا مش بقول انك تقبل بوضع مش حابه بس حدد انت عايز ايه من الأول.. متاخدش واحدة مختلفة عن معاييرك وتكون اعلى من معاييرك وعايز تغيرها وليه كرجالة مش ببتظهروا التفهم فالاول لحد م البنت تتعشم وبعدين تبان شخصيتك الحقيقة ليه دا يحصل في جواز الصالونات الى هو المفروض اكتر وسيلة محترمة ليه بتوصلوا البنات انها بقت بتخاف من قصة الجواز او ان يجي شخص يغيرلها معالم حياتها .. وأغلبهم اصلا بنكتشف ان منهم الى ملتزم إلتزام ظاهرى او حد بقا تانى بيقطع اصلا ف الصلاة بس هو عايز زوجة صالحة طب وانت؟؟ يعنى ايه راجل مشاعره تتغير فجأة بعد م بنات الناس تتعشم حتى مفيش تدرج طبيعي والموضوع ينتهى بمنتهى قلة الذوق حتى محدش من أهله بيلوموه انا عارفة ان دا نصيب وخير للبنت ولكن والله بنات زى الفل كتير بقت بتشك ف نفسها يعنى انتو عايزين توصلوا البنات لإيه.. انا ملقتش حد اقوله الكلام دا عشان مزودش عليهم الوجع ملقتش نفسي الا انى برجع اكتب هنا

2

6