”اللي مش محجبة عادي يتحـ ـرشو بيها لأنها متبرجة .. والمنقبة عادي يضطهدها الأستاذ في الجامعة، لأنو النقاب بلاصته الجامع مش الجامعة“ من جهة إذا كنتِ مش محجبة، رح يتعاملو معاك كأنك دعوة مفتوحة للتحـ ـرش، ولو كنتِ منقبة، رح يقولو أنك متشددة وبلاصتك الوحيدة هي الدار وفي كل الحالات، رح تبقى الضحية هي لي غلطت، هي لي بادرت وهي لي جابتها لروحها بزاف ناس يحكمو على أساس البنادم لي راه واقف قدامهم، مش على أساس المبدأ .. ومرات كثيرة نفس الشخص لي قال من قبل 'لوكان سترو رواحهم واحد ما يتحـ ـرش بيهم' تلقاه يقول 'وهاذي المنقبة علاه محكمتش دارها؟ عنده الحق البروف كي طردها، النقاب مش تع جامعة' هذا النوع معندهش مبدأ أصلا يحكم بيه، هو عنده مزاج وأفكار متراكمة ومتعفنة، الموقف لي يلقاه يروح يجري ليه باش يخرج هذا التراكم ويريح روحه من الثقل لي كان هازه توارث هذي الافكار خلق واحد من أغرب المفاهيم لي رسخها مجتمعنا: عادة لوم الضحية .. يعني في بلاصة ما نحاسبو لي غلط، نروحو نحوسو على أي سبب نعلقو بيه الغلطة على الضحية نفسها مش كامل الناس يقدرو على كلمة الحق .. وأسهل حاجة يديروها أنهم يحولو الجاني لـ ضحية الظروف، والضحية لـ سبب المشكل .. وهكذا تخلاص الحكاية ثم ثم لازم علينا نفهمو أنو الدفاع عن الخطأ بالتبرير هو مشاركة فيه .. السكوت على الظلم مش حياد، هو انحياز للظالم .. ولوم الضحية عمرو ما رح يكون تربية ولا نصح

2

3