ساعات بتشوف حد مُبتلى متصدقش ازاي قادر يصلب طوله! وازاي قادر يعيش وسط الأزمة الكبيرة اللي هو فيها! انت شايف من برا؛ لكن هو جوا البلاء غارق في ألطاف الله، لأن الله وعَد إن مفيش بلاء هينزل إلا وهو مُحاط بالألطاف .. ربنا سبحانه وتعالى قال على لسان سيدنا يوسف : { إِنَّ رَبِّي لَطِيفٌ لِمَا يَشَاءُ } قبل ما كان يبقى فيه أزمة، اللُطف كان بينزل الأول، فَلما اخواته رموه في البير ربنا كان مطلّع القافلة من البلد اللي منعرفهاش رايحة مصر وطالعة في اللحظة اللي اترمى في البير ووصلوا وربنا خلاهم ينزّلوا الدلو وأنقذوه .. إمرأة العزيز لما راودته عن نفسه وقالها لأ جري على الباب فَاتهمته إن هو اللي عايز يعتدي عليها لقى واحد من قرايبها وشهد شاهد من أهلها لو قميصه مقطوع من قدام يبقى كان بيعتدي عليها وهي بتدافع عن نفسها، ولو قميصه مقطوع من ورا يبقى كان بيهرب وهي بتشده، فلما رأي قميصه قُدَّ من دُبُرٍ قال إنه من كيدكُن، مين اللي جاب الفكرة دي في قلب وعقل الشخص اللي كان معدّي؟ ربنا .. يدخل السـجن يلاقي اتنين قاعدين معاه في نفس الزنزانة يحلموا حلم ويحكوله، واحد منهم كان بيشتغل عند الملك ويخرج قبله وربنا يخلّي الملك يحلم واللي بيشتغل معاه يقوله ده فيه واحد بيفسّر أحلام فيخرج من السـجن ويجعله على خزائن الأرض .. المعنى إن قبل ما الأزمة بتنزل بيبقى فيه لُطف موجود من قبلها، زي ما الدكتور بيديك البنج قبل العملية عشان متتألمش، ولله المثل الأعلى .. يشاء الله ابتلاءًا ويأتي معه اللُطف، يشاء عُسرًا ويأتي معه اليُسر، يشاء الأمر الصعب ويأتي معه النجاة.

2

0