أنا عندي صاحب من ابتدائي، هو أول واحد صاحبتُه في المدرسة. بس بعد كده صحبت ناس تاني، ومبقتش بمشي معاه زي الأول. لحد ثانوي، صحابي راحوا مدارس تانية، ومفيش غير هو اللي كمل معايا لحد الجامعة. هو دلوقتي صاحبي الوحيد. من فترة حصلت مشكلة، وأنا مردّتش أكلمه تاني. هي مش مشكلة كبيرة، بس أنا ضخّمت الموضوع. لما بفكر في صداقتنا، بحس إني اللي متضرر أكتر. لما بطلب منه نصيحة، مش بيساعدني ولا بيديني حل، بالعكس بيعقّدلي الموضوع أكتر. طول الوقت شايف نفسه أذكى مني، وأشطر، ولو دخلت معاه في جدال عمره ما بيقتنع برأيي. بيحب المظاهر، وبيصاحب ناس كتير، بس دايمًا يحسسك إنك إنت صديقه الوحيد، وإنك هتكمل معاه في الشغل وفي كل حاجة… مع إني ساعات بشوف إن ده كدب. في مرة خد مني فلوس، ومعرفش يرجعها. هو أصلًا عمره ما رجعلي فلوس خالص. وبيحب يعرف أخبارك أول بأول، من غير ما يقولك أي حاجة عن نفسه. أنا بقالي حوالي أسبوع مش بكلمه، وعملت له حظر. دلوقتي هو بيبعتلي وعايزني أرجع أكلمه. أرجع؟ ولا أكبر دماغي؟ مع إنه دلوقتي صاحبي الوحيد

3

6