هل تصرفي مع البنت اللي بحبها كان صح؟

Question

ازيكم
حابب اخد رايكم
كنت بحب بنت جدا وعلاقتنا كانت قويه اوي ببعض
روحت اتقدم لها وحصل مشاكل لها انا السبب فيها
والموضوع اتقفل خلاص استحاله هنتجوز
روحت جيبتلها عريس بنفسي  خوفا عليها لان اهلها كانو عايزين يجوزوها ناس مش مناسبين اكبر منها
ومشيت لها الجوازه وخلاص هتتجوز

رايكم
هل كده تصرف صح مني
هل دي قلة رجوله مني وكان لازم ابعد وخلاص

Durian_52455 🇪🇬 · Accepted Answer

الحمدلله يامانجة، وشكرًا جدًا على سؤالك 😍
بالنسبة لتصرفك، فهو مش صح ومش غلط
إنت كنت عايز تساعدها تعيش مع حد مناسب وقريب من سنها، وقدرت تعمل ده بفضل الله، وده يدل على إنك إنسان سوى وعندك شجاعة كبيرة
لإن اى حد مكانك غالبًا مكنش هيفكر نفس تفكيرك ولا كان هياخد نفس القرار..
اما بالنسبة لعلاقتك بالبنت، ف دى صفحة واتقفلت، بس جوا قلبك هى لسه مفتوحة،
اتمنى إنك تساعد نفسك زى ماساعدتها، بإنك تتقبّل اللى حصل♥️

Cherry_52446 🇪🇬 · Answer

لا عاش كويس إنك عملت كده
بس اتمنا ده ميكونش أسر علي نفسيتك

Mango_52448 🇪🇬 · Answer

هو دمرني الحقيقه

Cherry_52446 🇪🇬 · Answer

ده متوقع جدا
بس مش مشكلة الزمن بيدوب أي حاجة

Mango_52448 🇪🇬 · Answer

حاسس اني لو مكنتش عملت كده كنت هكون اهدي نفسيا حبه

Biscuit_40369 🇪🇬 · Answer

بص هو الموضوع اكيد مؤذي كنت حاسه انك ممكن تتمسك بيها اكتر او تحاول مع اهلها تاني بس انا مش عارفه بالضبط ايه الظروف بينكو  بس اللي حصل حصل مش هنبكي عاللي فات وطالما هي مش معاك دلوقتي يبقى انتو مش مكتوبين لبعض وكون انك اهتميت بيها اكتر من نفسك دي حاجه تحفه بجد وخلاص حاول تقفل التفكير فالموضوع وتقول لو كنت عملت ولو ومش يمكن ده احسن لا خلاص هو اللي حصل هو اللي المفروض يحصل و ربنا يجبر بقلبك يارب

Mango_52448 🇪🇬 · Answer

حاولت كتير احل بس مكنش في تاني خلاص
انا وقفت فعلا وجبتلها عريس بنفسي عشان اكون متطمن عليها لاني بحبها 😭

Durian_52455 🇪🇬 · Answer

ولازم تعرف إنك عملت اللى عليك….. وزيادة كمان
وكدة كدة إنت لازم هتحس بالذنب وتأنيب الضمير فى أوقات مختلفة
لإنك كنت السبب فى المشاكل اللى حصلتلها 
بس خليك عارف إن المشاكل هى اللى بتبين حقيقة الناس
كلنا بنشيل من بعض مشاكل، بس احيانًا طرف واحد بس هو اللى بيدفع الفاتورة كاملة
وهنا بتكون بداية النهاية مع الأسف

Durian_52455 🇪🇬 · Answer

نصيحتى ليك، إوعى تستسلم للشيطان
إوعى تقلل من قيمة نفسك علشان أى حد… مهما ان كانت درجة قربك ليه
زى ما الحب طعمه حلو اوى، كمان مؤذى اوى، ثقتك فى ربنا وفى نفسك هى اللى هتخليك تعدى العلاقة دى من دماغك ❤️
ومين عالم، يمكن المشاكل دى كانت هى أكبر خير ليك بس انت اللى مش عارف 😉
ربنا يرزقك بالزوجة الصالحة 🙏🏽🤍🤍🤍

Mango_52448 🇪🇬 · Answer

كلامك حلو جدا واثر فيا فعلا
بس المشكله اني فعلا دلوقتي متاثر جامد جدا جدا نفسيا وبدنيا وكل حاجه
وللاسف تخطي فكره النفصال عن حد بنحبه صعبه جدا + تخطي فكره انه يروح لحد تاني قدام عيني

Durian_52455 🇪🇬 · Answer

طبيعى تحزن
طبيعى تعدى عليك ايام مش قادر تعمل حاجة غير انك تفكر
طبيعى تلوم نفسك احيانًا على شيئ كنت انت السبب فيه
طبيعى إنك متكنش مصدق اللى حصل ومش مستوعب إنها راحت لحد غيرك، وإنك كنت بردو السبب فى ده
طبيعى… المرحلة اللى انت فيها دى طبيعية جدًا
خد وقتك فى الزعل كله، بس حط مدة/فترة محددة لنهايته
والا هتعيش سنين طويلة غرقان فى التفكير فيها حتى وانت بتشتغل ومتجوز كمان!!!
(كل حاجة بتعدى)🤍