نفسي ارجع للوقت الي احب اصحا فيه للمدرسة بدري علشان اقف في اول الصف وتشم كدا الهوا البارد بتاع الفجر و تلاقي الدنيا دخان و شبورة جوا المدرسة و الحوش فاضي و معاك ناس متعرفهمش اكبر منك واصغر منك و كلكم تقعدوا تجروا ورا بعض ولما يجي وقت الطابور واقف في الأول كانت بتقف جمبي احلي واحده شفتها في حياتي و كنا نقف في الطابور اول ناس و كنت ابصلها الاقيها بتدحك و تدور وشها الناحيه التانيه وانا بلا اراده و عفويه تامه اعمل زيها. و يقوم بقيت العيال يقوموا جايين يخربوا اللحظة الحلوه دي بس برضو لسه بحبهم لانهم اخواتي مش صاحبي. ويقف قصاد الطابور بتاعنا مدرس و في ايده عصايه و لابس نظارة و يزعالنا: اقفوا في الطابور كويس. الي كان يدايقني بقا اننا بعد ما نخلص تحيه العلم يقولنا للخلف دور و كل واحد يطلع علي فصله بس في نفس الطابور طبعا فتلاقيني اخر واحد طالع الفصل يا بيضة يا الي اخترع القانون ده في المدرسة امال هتخليني احب اروح بدري ليه. 1️⃣، 2️⃣عموما اول يوم طبعا حصتين عربي ورا بعض معروفه يجي الاستاذ الي كان واقف قصادنا في الطابور يدينا الحصة و متسمعش لحد نفس. 3️⃣بعدها رياضيات تدخل الاستاذه الطيبة شوية بس كانت عصبيه تكتبلك اوحش ٣ جداول ضرب و فاكر مره اختارتني لجدول ال٦ وطلعت وعديت علي ايدي بس محدش خد باله الحمد لله. وزي فعلا ما كان بيحصل في الكرتون في واحد طالع يحل برضو وناسي حاجة و وبنت واقفه جمبه يسالها والله يا جدعان غششته غلط والله حصلت قدامي ربنا يسامحها بقا الواد علي ما اتذكر كان اضرب. 4️⃣الحصه الرابعه دراسات كانت عاديه بصراحه بس الاستاذه الي كانت بتدينا ادتنا الماده دي طول السنين تقريبا مكنش في غيرها. 🆓الفسحة بقا يا جدعان انا فاكر مره موقف مش هقول حلو بس يبينلك الفرق بين شبحنه دلوقتى و شبحنه ايام الخير من ١٠ او ١١ سنه كنت قاعد باكل السنداوتش بتاعي جبنه و طماطم الي كنت بحبه خالص و بالصدفه كده كنت جايب معايا كيس فوكس اول ما نزل كنت جايبه بالجبنه فنا قاعد باكل كنت لسه متعرفتش علي حد لقيت ٢ تقريبا اكبر مني وواحد معاه قصافه و جاي يهددني بالمبرد تخيل بقا دي ساعتها كانت عامله ازاي قالي هات شبسي ليا و لصاحبي قولتله ماشي و اديته واحده هو وصاحبه و مشوا بس وانتها الحوار 😂😂. والله يبني لو انت جتلي عادي و قولتلي عايز شوية كنت هديك برضو عادي. وطبعا زي ما احنا عارفنين اول ما جرس الفسحة يضرب انها خلصت تلاقي ٢ اساتذه كبار و معاهم خرازانات مش عصيان لا خرازانات ماشيين يضريوا في العيال علشان تطلع الفصول والي يجري و الي يصوت و الي يقع علي الارض و حالتها حاله. 5️⃣الحصة الخامسة موسيقى انا فاكر مره الاستاذ بتاع الموسيقى كان غفلني قال في مره عايزين حد يغني في الإذاعة نشيد فجه يعزف النشيد علي الاوكورديون بتاعه من اول النشيد للآخر انا كنت تعبان و مناخيري ضاربه خالص يومها بس البنت الي قولتلكم عليها في الأول دي قالتلي روح جرب فطبعا روحت يا سلام و لو عايزاني انا الي اعزف كمان مفيش مشكله المهم رحت وجاي اسمع النشيد من اوله الاقي المحترم بادئ العزف من نص النشيد ربنا يسامحه برضو انا بقول كلام و هو بيعزف حاجة تانيه انا واخد بالي بس مكنتش مدرك اني اغير الي بعمله و اغني في الجزء بتاع اللحن ده قعدت و طبعا كله قعد يدحك بمن فيهم انا لانه حرفيا رقصني ليه يبدا من النص الوحيد في الفصل الي عمل معايا كده مش ناسيهالك يا استاذ والله 😂. 6️⃣، 7️⃣الحصة السادسه و السابعة انجليزي يستحضرني موقف حلو اني اتكرمت من مدير المدرسة في الانجليزي فطالع علشان اتكرم ( هو المدير كان متشدد شوية و منبه علي اللبس جامد) انا كنت تعبان فماما مخلتنيش انزل من غير جاكيت فلقبته بيقولي بدل مبروك انت جاي لابس مخالف قولتله طب انا تعبان اعمل ايه مش ناسيهالك برضو. و كان في مره الاستاذ بتاع الانجليزي اخترني انا وواحد صاحبي و شوية طلاب نعمل زي تجارب اداء لو فاكرين فكان بيبقي في زي نشيد بالانجليزي سطور كلمتين تلاته بالكتري و نقعد نقراهم اليوم بقا بتاع تجارب الاداء مش فاكر روحت اعمل ايه و مروحتش فجه اليوم الي هنطلع نغني فالاستاذ الراجل المحترم جه علشان يقولي يلا قام صاحبي جزاه الله خيرا قاله دا محضرش تجارب الاداء (ملحوظة بس : كان المفروض العيال الي تطلع تبقي حافظة و كان منبه علينا مش هنطلع بالكتاب) اتفاجا بالعيال طالعين بالكتب و قاعدين يرصوا الكلام وانا كنت حافظ لاني كنت عامل حسابي اطلع بس خير بقا عادي. الحصة الثامنه و الاخيره الحمد لله تقريبا كانت دين او تربيه اجتماعيه او علوم 8️⃣علوم دي معاها تجربه يعتبر هي الاجتماعية الوحيده عندي كان في زي لجنه او حاجة مش عارف بس اساتذه من بره كانوا جايين و المدرسة بتاعه العلوم ربنا يجزيها خير كنت بحبها اوي اختارتني علشان نمثل حاجه زي مسرحيه كده فجمعتنا انا و شوية عيال في المعمل الصغير و قالتلي اقعد هنا و لقيت بعدها بنت تانيه حلوه برضو قالتلها تقعد جمبي ( ياخي والله يا ليت الشباب يعود يوما) و لقتها بتكلمني لوحدها و تعرف اسمي كمان كانت بقا بنت الاستاذة ولا ايه معرفش المهم كانت حلوه و كانت تعرفني وبعدين رحنا المعمل الكبير لقيتها بتقول مين يقدر ياخد طبق في فواكة متقطعه و يطلعه من شنطة و كده و يقعد يشرحه ( ساعتها كنا بناخد حاجه اسمها المخلوط) فقولت انا و مكنش حد تاتي كان عايز كده و كنت مستغرب لانه عادي يعني فيها ايه و الي خلاني استغرب اكتر لقيتها بتقولي فعلا هتقدر تعمل كده قولتها اه عادي ببص علي بقيت العيال يوم التقديم وشهم كان مرسوم عليه الي مرسوم اوكسوجين و الي ثاني أكسيد الكربون و ميه و كان مهرجان 😂 طبعا متسالنيش عن حصة الألعاب الانها كانت نادرة في الفصل بتاعنا الصراحه ويوم ما بتيجي يا الاستاذ بيقعدنا لحد ما كلنا نسكت خالص و يقولك يلا هننزل يا اما ينزلك و يقولك هنتمرن شوية ياخي كميه هبل ملوش لازمه سيب انت الكورة واحنا مننا لبعض طبعا الكلام ده مش للبنات كانوا بياخدوا كورة سله و البتاع الي بتقعد تلف حوالين الوسط دي و بس واروح بقا مفيش احلي من كده خالص والله لو قرات لحد هنا فنا بشكرك و بعتذر لك لو ضيعت وقتك سامح الطفل الي جوايا

2

1