كل مره بعدي فيها من جنب مدرستي الابتدائي بسرح لبعيد مع ذكرياتي وأنا طفله مع أحلى أيام حياتي اللي من ساعة ما كبرت مشوفتش يوم ف لطافة الأيام دي مهما عدت عليا أيام لطيفه وأنا كبيره بس لا تقارن بأيامي ف طفولتي وذكرياتي وأنا طفله عندها ٧ سنين أقصى طموحاتها مامتها تسرحلها شعرها وتروح المدرسه تلعب مع صحابها وترجع تعمل الواجب وتلعب برده..بيمر قدامي شريط حياتي وأنا صغيره بمجرد ما ألمح مدرستي بفتكر كل ركن فيها كنت بعمل ايه بفتكر كل حاجه ودموعي بتغلبني وتنزل بسرح لبعيد وأتمنى لو الزمن يرجعني ولو يوم واحد بس أعيشه من أيام طفولتي يوم واحد بس! بتمنى الزمن يثبت عند سن الطفوله ويفضل ثابت بينا ميتقدمش ! ذكريات طفولتي مفيش أجمل منها كل ما بعوز أفرح بفتكرها وأضحك قد ايه كنت مشاغبه وروحي وحضوري كانوا حلوين..صحابي وأنا صغيره ولعبنا وخناقتنا التافهه سوا.. آه بجد الدنيا طلعت صعبه وأنا طفله كان نفسي أكبر وأشوف شكلي هيبقى ازاي لما أكبر وأديني كبرت وبقول ياريت لو أرجع طفله تاني! الحياه خلتني مطفيه من جوه وحقيقي حياة الكبار طلعت أصعب مما تخيلت وأنا صغيره كنت فاكره إني لما أكبر هكبر وخلاص وهفضل علطول فرحانه وبلعب وكل الناس اللي ف حياتي هيفضلوا موجودين..كانت كلها مجرد أحلام.. آهِ لو كانت الدنيا أخف!

3

1