أهلًا من جديد النص طويل فيستحسن تقرأوا دعاء السفر اكتر من شهر وانا بحاول اشتغل على نفسي، اسحبها شوي شوي من المشتتات، من كل إشي ممكن يستهلك طاقتي او يبعدني عن اللي بدي اوصله… وبهالفترة، لاحظت شغلة غريبة بس مو جديدة علي ، يمكن كلنا بنمر فيها لما نقرر نترك معصية أو عادة سيئة مثال؟ لما نقرر نترك الأغاني فجأة بنصير نحس إنها موجودة بكل زاوية! مطاعم، مقاهي، بيوت أصحابنا، حتى واحنى بالشارع بنمر جنب سيارة مشغلة أغنية كنا نحبها زمان وكأن الدنيا كلها متفقة علينا او وبدها تذكرنا فيها بس السؤال هل هي دايمًا كانت هيك؟ الجواب غالبا أه بس لما كنا منغمسين، ما كنا نشوف، كنا مشغولين جدًا بالاستماع، ما كان عنا "النية" إنا ننتبه، بس اول ما ننوي التغيير، بصير كل إشي حولنا بيختبر بصراحة أنا حاسة حالي وصلت مرحلة من التبلد العاطفي. بس التبلد مش دايم، بلحظات معينة بنفجر، دموعي بتنزل فجأة، ومن كثر ما صرت حساسة، صرت أكتشف إني أضعف بكتير مما كنت أتصور، خاصة لما يتعلق الموضوع بالعلاقات وهاي الفترة… حاولت أهرب من معصية معينة أولها لما طنشتها تمادت ضلت وراي، ملزقة تضغط شوي شوي، لبين ما ضعفت وللأمانة يا ليتني ما ضعفت الشيطان لما يشوفنا بنحاول نلتزم، بصير يجمل المعصية بيخلينا نحس إن حياتنا رح تصير فراغ إذا تركناها، وإنه رح نغرق بالحزن ،بالوحدة، بالاكتئاب وكلها أوهام ووساوس من ابليسو وظيفته يضللنا، وإحنا بنحتاج نقاوم فلو في حدا بيقرأ كلامي، وبيحاول يتخلص من معصية بس مو قادر بقولك من قلبي تخلص منها أنقذ حالك قبل ما يصير الوقت متأخر والله إن المعصية بتهلك، بتسحبك شوي شوي، وبتخلي قلبك يبرد، وروحك تثقل حياتنا قصيرة، والأيام بتركض اليوم إحنا هون، وبكرا يمكن نكون تحت التراب. فخلينا ننتهز فرصتنا ونختار النجاة والكلام موجه لي قبل ان يكون موجه لكم اذا حدى وصل لهون لا تنسوني من دعائكم ولكم بالمثل ان شاء الله 🌷 دمتم سالمين، برعاية الله☘

8

0