حرب جوايا.. عايزة ارتبط بس بتكسف وبخاف من ربنا

Question

السلام عليكم 
انا اول مرة ليا هنا و حبيت الجو اوي و عايزة اتكلم بصراحة و عايزة بنت كبيرة شوية تنصحني انا عمري في حياتي ما ارتبط ولا دخلت في أي علاقة قبل كدا ديما في حرب جوايا اني عايزة ارتبط بس مش عارفه و بتكسف و بخاف من ربنا و بقرف لما بفكر كدا و في نفس الوقت مش عايزة ادخل في أي حاجة رسمي ابدا حاسة اني معقدة و مش فاهمة نفسي بجد بحس اني عندي احتياج عاطفي كبير بس بحاول اتحكم في نفسي عشان مش عايزة ادخل في أي حاجة كدا و السلام تقلل مني و الفكرة اني اصلا ماليش اي تعامل خالص مع الجنس الآخر من و انا صغيرة و لحد ما أنا في الكلية بخاف منهم و ببقى طول الوقت حاسة بقرف منهم و من تصرفاتهم مش عارفة بقى ازاي عايزة ارتبط و ازاي بقرف منهم و كمان لاحظت للاسف اني ينجذب اللاكبر مني في السن بكتير لدرجة اني مرة اعجبت بمدرسة الفيزيا بتاعي رغم أنه كبير جدا في السن و كان جد اصلا بس مجرد أنه أظهر ليا اهتمام طبيعي فضلت فترة موهومة اني بحبه و طبعا السبب الواضح هوا غياب حب ابويا عني رغم أنه حاليا ندم و بقى حنين بس مش حاسة من ناحيته بأي مشاعر مش عارفة لما بتخيل اني اكون في علاقة مع راجل بيعاملني باهتمام مبالغ فيه بكون راضية بس بحس أنه ضعف كبير مني واني مش اكيد مش هيكون فيه راجل كدا اصلا و فكرة اني ادي الأمن دي مستحيلة بالنسبة ليا لأن حرفيا لما بسمع موضوع الجواز ده بترعب بجد

Cookies_83758 🇪🇬 · Answer

كويس انك عارفة انك عندك احتياج طبيعي زي كل الناس وفي نفس الوقت عارفة انك هتنجذبي لأي اهتمام بس برضه واعية كفاية ومش عايزه تدخلي اي حاجة وخلاص ودي حاجة بجد كويسة 
ممكن تبدأي تتعاملي عادي مع الولاد تكسري بس الرهبة في حدود الزمالة يعني
ولما يحصل قرب من حد او اهتمام مفاجئ خدي بالك انه يكون حد كويس مش بيلعب عشان ماتتشديش بسهولة بالاهتمام

Coffee_73439 🇪🇬 · Answer

انا شايف انك في طريقين أحلاهم مر بس خلينا نحط قدامنا الاختيارت ونشوف انهي احسن
انك تكوني زي مانتي دلوقتي قافلة علي نفسك ومش مدية اي فرصة لأي شاب
او انك تدخلي في علاقة مرة واتنين وتتعلمي من ده وده وتستنزفي مشاعرك في الاماكن الغلط 
ملحوظة ان جوزك المستقبلي مكتوبلك هو مين من قبل حتي ما تتولدي ومش هتقدري تغيري في القدر
فهل شايفة في المستقبل لما تتجوزي تكوني في شبابك اختارتي الاختيار الاول ولا التاني؟

Strawberry_84060 🇪🇬 · Answer

فعلا كتير بفتكر حتة اني مهما عملت نصيبي مكتوب هكون مع مين و كدا بس انا حتى في أي حاجة رسمي مش متقابلة الوضع ابدا و برفض حتى من قبل ما اشوف الشخص أو اعرفه هيا حالة بتنزل عليا اول ما اسمع أن فيه حد متقدم خوف و رعب و قرف انا بقى مش فاهمة منين عايزة ده و منين بهرب منه فاهمة

Strawberry_84060 🇪🇬 · Answer

مش حاسة أنه الحل اتعامل مع حد اصلا لان ديما فكرة أن حد فيهم هيستغلني دي مش بتبعد عني ابدا فبلاقي نفسي طلاقي في حالة نفور من قبل حتى لما افكر

Coffee_73439 🇪🇬 · Answer

فاهمك الموضوع طبيعي انتي مش غريبة يعني ولا حاجة ناس كتير كدا
بس ممكن لو فيه مشروع جواز تدي فرصة لخطوبة ومتصديش وتقاومي الشعور ده بس مهم جدآ متديش اي مشاعر خلال فترة الخطوبة وتركزي علي طباع وصفات الشخص ده وهل هو مناسب ليكي أو لا والقلق ده هيفضل ملازمك ويفضل يكبر لحد يوم فرحك ده طبيعي بس مع اول يوم مقفول عليكي مع شريك حياتك هيبدأ الشعور ده يختفي تدريجي وتحسي بالأمان لكن مهم تختاري صح في فترة الخطوبة

Blueberry_79752 🇪🇬 · Answer

حاولي توفري لنفسك جو من الاهتمام والرعاية وحبي نفسك واديها مشاعر دعم وطالما ابوك رجع وندم وكده معلش تعالي على نفسك واقبلي المشاعر دى منه احسن ما تاخديها ف الحرام يا بنتي وتضيعي نفسك ، حافظي على نفسك واوعي العلاقات هتستهلكك والله وتهلكك وهتكرهي نفسك اكتر فبلاش نصيحة لله ، املي حياتك انشطة وصاحبي بنات كويسين يدوك مشاعر حلوة لحد ما تتجوزي ف الحلال ربنا يرزقك

Cherry_73757 🇪🇬 · Answer

كلنا متفقين ع انك تحافظي علي نفسك وتخليكي زي ما انتي لانك انتي الصح سيبك من الي الدنيا من حوالينا بقت فيه وكله بقا الارتباط بالنسباله عادي ومبقاش في رسميات باي حجه بقا اشهرها الظروف بس صدقيني اي حاجه بدايتها لا ترضي الله نهايتها لا ترضي العبد الاهتمام الي بتتكلمي عنه دا في شخص ادهولي واداني كل مشاعر الحب النضيفه الي اي بنت بتتمناها ف الاخر اكتشفت انه مريض نفسي وانه حتي الشخصيه الحلوه دي مش شخصيته

Apple_63866 🇪🇬 · Answer

كان نفسي اتعرف عليكي مش ناقص تعقيد في حياتي 😂
بس الحلو انك عارفه مشكلتك ودي نقطه حلوه بس حاولي انك تبقي مرنه شويه في التعامل وياريت تكتفي بحب ابوكي حتي لو كان غلطان معاكي قبل كده محدش هيحبك زيه ونصيحع تستني صاحب النصيب وبلاش تفتحي قلبك لحد عشان متتجرحيش عشان واضح انك هتحبي بكل مافيكي

Cherry_32857 🇪🇬 · Answer

نفس احساسي بالظبط وبجد مش عارفة اقولك أنا مش مصدقة  اني مش لوحدي اللي حاسة بالإحساس ده وفي نفس الوقت عاوزة انصحك انتي لو في دماغك ارتباط وحاسة ان ده الفيصل اللي هيخليكي تاخدي قرار في الموضوع ده على الأقل تاخدي فكرة عن الجواز او الإرتباط في العموم، فا لو هترتبطي خلي دايما في حدود بالغصب يعني على رأي اللي نصحوكي هنا برضه خليكي مرنة كده بمعنى متنشيش بس برضه يعني متبقيش مايعة مثلا 😂أنا بكلمك كأنك نفسي

Cherry_73757 🇪🇬 · Answer

خليكي زي ما انتي ونصيبك هيجيلك لحد عندك وهيبقي ربنا مبارك فيه وربنا يرزقك بالي يستاهلك يارب صدقيني الارتباط الغير رسمي دا ماهو الا استنزاف طاقه ومشاعر حبي نفسك وقدريها واشغلي نفسك باي حاجه مفيده ليكي اتعلمي حاجه جديده غيري ف روتين يومك كل دا هيفرق معاكي متسبيش نفسك للفراغ ولدماغك تسحلك معاها حافظي علي قلبك ومشاعرك عشان انتي تستحقي كل حاجه حلوه ربنا يرزقك ب ابن الحلال الي يصونك ويحافظ عليكي❤️

Strawberry_73341 🇪🇬 · Answer

بصى الارتباط مش حاجه سهله ولا هينه ابدا ولا انو شخص بيهتم بيكى وبيملا فراغك العاطفى لانو اللى بيعمل كده بس اعرفى انو مؤقت وشويه وهيمشى لانو مجرد تسليه وانتى مش هتعرفى ده وهتكونى مجرد لعبه وهتتأذى جامد الارتباط الحقيقى هو انك تكونى جاهزه تدى مشاعر واهتمام وتكونى قادره انك ترتبطى بشريك لحياتك بكل شيئ يخصه تتحمليه وتتحملو اعباء الحياه مع بعض الارتباط مسؤليه زى مسؤليه الجواز كده

Strawberry_73341 🇪🇬 · Answer

نصيحه اخت ليكى اشتغلى ع نفسك ثقفى نفسك اقرأى كتير ف كتب علم النفس وازاى تتعاملى مع نفسك اعرفى نفسك واكتشفيها حبيها قعدى نفسك قدامك واتكلمى معاها وحلى مخاوفك معاها نفسك الوحيده اللى عمرها ماهتسيبك استثمرى فيها احضرى كورسات كتير ونمى من نفسك اشتغلى خاليكى شخص ناجح قربى من ربناوقوى علاقتك بيه  صدقينى احسن من اى شخص ف حياتك اول ماتعملى كده حياتك هتتغير للاحسن مع اهلك مع نفسك

Strawberry_73341 🇪🇬 · Answer

بالنسبه للارتباط اوعى ترتبطى وانتى مش جاهزه نفسيا ومعنويا ومتديش لحد اى فرصه برا بيتك الارتباط الصح هو اللى بيجى البيت وعايز يعمل معاكى حياه ممكن ترتبطى ك خطوبه مش اقل من سنه تعرف الشخص هل هو مناسب هيدعمك او لا هتحبيه هترتاحى ليه شخصيه كويسه او لا متجربيش ترتبطى اى ارتبط من نوع تانى لانك هتتأذى جامد

Coffee_61063 🇪🇬 · Answer

ممكن نتواصل خاص