ممكن أحكى عن بنت غريبة شوية بيسموها الايام دى إنسانة معندهاش طموح بس هى مش بتهتم بكلام حد.. هى بنت عادية مستمتعة بعاديتها مش حاسة انها مضطرة تثبت لحد حاجة عايشة حياتها بالطريقة الى بتريحها هى.. عاملة لنفسها عالم صغير حدوده البيت اصل هى مش بتحب الخروج يمكن دا عيب من وجهة نظر اهلها وأصحابها بس هى بتحب البيت ودفا البيت والكيك الى بتعمله الصبح وريحته بتعملى كل مكان.. بتحب البلكونة وزاعة فيها ورد بتسقيه كل يوم بعد الفجر وبعدين تقعد تتأمل السما كأنها شايفة حد من عالم تانى محدش شايفه غيرها..بتحب الليل والبحر خصوصا ف الشتا البحر بالليل فالشتا يبان مشهد حزين شبه قلبها بس دايما وشها عليه بسمة خفيفة.. بتهرب من التجمعات بس لو اضطرت تكون وسط ناس بتكون اكتر حد بيتكلم وبيهزر ميبانش عليها ابدا انها مش اجتماعية واول م الناس تمشي بترجع تانى لطبيعتها.. بتحب الرسم وشوش الناس واى شئ حوليها بتركز فيهم ممكن ترسمهم ازاى.. بتحب تكون طول الوقت ساكتة ولو اتكلمت ف مرة بتفضل ندمانة بتخاف من قرب الناس وبتهرب من لما بتحس بتعود ع وجود اى حد.. هى مش لوحدها هى اختارت تعمل لنفسها عالم بعيد عن الناس عالم مليان حاجات غيرهم.. عالم بتحب فيه بتحب شخص خيالى عارفة انها مش هتقابله فالواقع بس ممتنة لمجرد وجوده جوا عقلها.. رافضة تحط نفسها فأى وضع تقييم عشان تعجب حد او انها تعمل شئ مش عاجبها لمجرد ان حد يثنى عليها.. هى اختارت انها تستمتع بكل شئ حوليها لوحدها صاحبت كل شئ حوليها الا البشر.. لحد م فعلا اتنست الناس نسيت انها موجودة ودا فعلا الى هى كانت محتاجاه كأنها طيف او خيال او جنية عايشة في عالم سحري البشر ميعرفهوش انه موجود او انها موجودة

3

4