وانا صغيرة كنت بكرهه النوم جدا أقصى طموح ليا وقتها انى أسهر للساعة ١٢ وطبعا دا مكانش بيحصل عشان المدرسة حتى فالاجازة بس ساعات كنت بعمل نفسي نايمة 😂😂.. لكن مع الوقت ولما بدأت اكبر بقيت بحسب النوم أوى بحس فيه بالأمان انه محاوطنى من إن حد يإذي مشاعري بكلمة.. بعد كام سنة كمان النوم بالنسبالى بقى وسيلة من خلالها بفقد الشعور بوجودى مش مجرد هروب انا وجودى ف حد ذاته بقى بيحسسنى بالألم ،الذنب ،التقصير، شعور انى مش كفاية ومش مميزة وإنى متحبتش بالطريقة الى محتاجاها فكنت بحس إن أسهل طريقة هو فقدانى للشعور اصلا ودا من خلال النوم.. اكتر عقاب نفسي ممكن حد كان يعاقبهولى هو انه يصحيني من النوم وبابا كان بيعمل كدا من باب الحفاظ ع النظام بس فعلا كانت لحظات بشعة لأن محدش حاول يفهم انا بنام كدا ليه هو اتحكم عليا انى كسولة وخلاص.. لكن الحقيقة انى مع كمان النوم ساعات مش بكون نايمة بس مغمضة عيني عايشة ف عالم خيالى بتاعى كنت طفلة خيالها واسع جدا.. ولحد دلوقتي لكن بقيت مندمجة مع الواقع أكتر بهرب بس بالنوم.. بعد موت بابا بسنة قررت انى أتخطب مكانتش فكرة حب كنت بس حاسة ان اى حد ممكن يملى شعوري بالوحدة بقزة الدبلة العجيبة😂😂 ..ف مش هنام كتير هكون متحمسة بغض النظر عن ااشخص بس الى حصل انى لبست الدبلة من هنا وكملت نوم عادى😂😂 الموضوع مطلعش إن اى شخص ممكن يكمل شعور الوحدة بالعكس نومى زاد عشان افقد الشعور بالوقت وبنفسي وبلى عملته في نفسي لحد م مقدرتش وفسخت الخطوبة.. لما حد بيسألنى نفسك ف ايه مش ببقى عارفة ارد انا فعلا وجودى فحد ذاته مضايقني .. وانا أصغر شوية كان عندى شوية أحلام ع شوية أمل بس شعوري انى بكبر مخليني أحس انه خلاص وقت الأحلام خلص .. مع حبي للنوم انا كمان اغلب سنين عمري بقلب يومي حتى وانا بذاكر .. اقوم اصلى وبعدين انام .. بحب الليل جدا ..بس دلوقتي انا مش بحب حاجة انا عايزة انام بس نوم طويل انا مش حزينة ومش فرحانة ومش حاسة بحاجة اصلا انا بصحي من النوم عشان بس ماما متزعلش لان مفيش غيري معاها فهى بتزعل لما بنام وبسيبها.. انا فقدت كل مشاعري الحماسة.. الثقة.. الألم.. الحب.. الإنتماء.. عايزة أنام وبس

3

9