بحب واحد وبحبني بس حرام.. هل ينفع أدعيله؟

Sugar_21572 🇪🇬

منذ 5 أيام

شعور مرتبك

أنا في واحد بحبه و بيحبني و سيبنا بعض اكتر من مره عشان حرام نتكلم و احنا عارفين ده كويس اوي بس رجعنا للاسف و أنا دايما ضميري مأنبني بس في نفس الوقت مش عارفين نبعد بنجرب والله كتير بس مش عارفين خالص بس بنجاهد دايما هل ينفع ادعيله او يدعيلي اننا نبقي من نصيب بعض في الحلال خصوصا انه بيتشغل و بيحوش عشان نبقي سوا و في خلال مثلا بالكتير اوي كام شهر و يجي يتقدملي و شقته موجوده و لا مش هينفع ؟ بحس بجاحة مني اني اطلب من ربنا حاجة زي دي وانا بعصيه بس والله بجاهد و بحاول اكتر من مره و مش عارفين لان بيكون في مازال بينا كلام لان بتربطنا حاجات مشتركه في الكليه و أنشطة عارفه انه مش مبرر و الإنسان ضعيف و بنتخلق عشان نتوب و نذنب و نتوب بس هل ينفع ادعي ربنا كده ولا لا؟

صراعي مع الحب الحرام وندم الماضي

سلام عليكم أنا عندي ١٨ سنه الموضوع بدأ في تالته إعدادى و انا كنت عايش في حالي و مليش دعوه بحد و ببعد عن الحب و العلاقات دي علشان في دماغي أنها هبل لاكن مكانش في دماغي فكره انها حرام و كده المهم كنت باخد درس رياضه في بيتنا و كان في بنت بتيجي الدرس ده و هي كانت محترمه في لبسها و كده بس ولا كانت بتشغلني في مره كنت برسم في الدرس و انا عندي العاده دي دايما فهي شافت الرسمه و مره واحده قالتلي انت اللي راسمها يعلم ربنا اني حتى كنت مستحرم ابص لبنت فقولتلها اه و شافتها و عجبتها و انا كولد طبعا عجبني أنها معجبه برسمتي فعرفت انها بتحب الرسم برضو و اتفقنا أنها تجيب الاسكيتش بتاعها و اشوف رسوماتها و دي بدايت القصه كلها كنت بنزل اخرحمهم من البيت و بقف اتكلم معاها شويه لاني اعجبت بيها أو اعجبت باهتماها المهم في اخر يوم تالته اعدادي خلاص كنا مش هنشوف بعض تاني و انا قولتلها قالتلي احنا متفقين نرسم مع بعض في الاجازه و خدت موبايلي كتبتلي رقمها و بدأنا نتكلم و حبيتها و كل الكلام اللي احنا عارفينه و بعد شهور كلام لقيتها في يوم بلكتني عرفت أن امي كلمت امها و اتفقوا مع بعض أننا مينفعش علاقتنا كده لان ولد و بنت و كده طبعا كنت صغير برضو فدخلت في حاله وحشه و بعديها اكتشفت حوار امي ده و رجعنا نتكلم من وراهم تيليجرام قعدنا نتكلم لغايه اخر اجازه اولا ثانوي و انا كان دائما شاغل بالي حاجه واحده أن علاقتنا دي حرام فعلا ولا لا للعلم ممكن ابقى نزلت و شوفنا بعض مرتين و لاكن ولا اقدر المسها حتى لاني مستحرم و في مره قولتلها خلينا صادقين أنا بحبك و انتي عارفه و انا عارف انك بتحبيني دي اول مره اعترفلعا و قولتلها بس هل تفتكري اللي احنا فيه ده يرضي ربنا و طبعا هي اغلى شخص حرفيا في حياتي و معملتش كده غير لما سمعت شيوخ كتير و سألت و عرفت أن حتى لو كملنا على كده و اتجوزنا ربنا مش هيبارك في جوازنا فقولتلها ده كله و قولت اكيد هتبقى فاهمه و اتفقنا نبعد لغايه ما ربنا يسهل و اجي اتقدملها و نرضي ربنا و حصل فعلا. و قعدنا كده لغايه نص تانيه ثانوي و انا في يوم نزلت الانستا و لقيت حسابها و هي عندها كذا ولد و كده و ساعتها مقدرتش امسك نفسي دخلت قولتلها ايه ده كدبت و كده و كشفتها و فضلت تقولي أنا بحبك مهما يحصل و مهما شايفني ايه و انا عارفه اني شخص وحش و ده كله بس بلكتها وقتها و قفلت كلام و ساعتها حرفيا كنت في اوحش ايام حياتي مبقتش بذاكر و مش فارق معايا حاجه و نزلت اتعرفت علي صحاب جداد ولاد و بنات و في يوم بنت اتعرفت عليا و حاولت أبعدها و لاكن يوم ورا يوم قربت مني اكتر و اكتر و انا قربت منها و كنا بتلعب سله دايما مع بعض و اتشهرنا في النادي بالفريق بتاعنا و كده و هي للاسف حبتني أنا كنت حابب طريقتها و خوفها و كلامها معايا و. لاكن كنت دايما يفهمها و اقولها اني مش بحبها و هي كانت مصممه و انا كنت حرفيا مفيش يوم نسيت فيها البنت الأولي و جه وقت عليا بعد امتحانات ثانوي قولت لازم افوق و كده و بلكت كل اللي عندي و دخلت قولت للبنت بتاعت السله أن كل اللي احنا فيه ده حرام و مينفعش و لعبنا حتى و كده كانت متفهمه و بعدنا و في يوم لقيت نفسي دخلت اكلم تاني البنت الأولي لأن في خناقتنا الاخيره كانت باعتالي أنها زي كلام بتستنجد بيا فيه انا طبعا فهمت كده و دخلت قولتلها لو عاوزه تفضلي مكمله في كل اللي انتي فيه ده كملي و قوليلي اه علشان ارتاح و لو مش عاوزه قوليلي و انا هخرجك منه بطريقتي و قالتلي أنا مش عاوزه كله ده و اني انجدها و قد حصل و بدأت معاها من تاني خليتها تحكيلي كل واحد عرفته منين و ايه حكايه كل واحد و كده و انا بسمع حرفيا بتقتل انها نسيتني و عملت كل ده و انا اللي كنت عايش علي وهم عمتا الكلام ده كلها بدأ من قبل اجازه تالته ثانوي بشويه اتفقت معايا نشوف بعض في نادي و نزلنا و كده أنا كنت طول الوقت مش بتكلم بسمعها و بس و هي واخده بالها حاولت تمسك ايدي و لاكن رفضت لاني مستحرم برضو و يوم كان حلو و عدى و بعديها بيومين اكتشفت انها لسه بينها كلام و بين حد فدماغي بقى كنت هموت منها و مش قادر افهمها لاني حرفيا عملت معاها كل حاجه فكرت في كل حاجه حصلت و جه في دماغي أن حتى و احنا كنا في النادي ده كان علي موبايلها مستنيها ترد أنا مش متخيل و عمتا اتفقت معاها ننزل نشوف بعض من غير سبب في كافيه و كان في دماغي اني اخد حقي منها اديها كلمتين متقدرش تنساهم و هي قاعده قدامي و اقفل موضوعنا نهائي و اللي حصل أني شوفتها بالفعل و لاحظت تعبيرات وشي و قالتلي فيه ايه قولتلها تفتح موبايلها و تديهولي عملت كده و لقيتها مسحت الواد و لاكن كنت عامل حسابي و واخد اسكرينات من موبايلي بطريقه معينه عرفت بيها المهم هي قعدت متجمده و انا قاعد بقتلها بكلامي لدرجه انها كانت بتعيط و انا حرفيا مستمتع و في نفس الوقت مكسور لاني بحبها اكتر من نفسي و الله و في لحظه اغمى عليها و انا خوفت عليها مره واحده و جيبتلها عصير و فوقتها و شربتها العصير لغايه ما بقت كويسه و فضلت تقولي و هي منهاره اعمل فيا اللي انت عاوزه اقتلني و لاكن متسيبنيش أنا مش هقدر اعيش كده و مش هقدر تخليك تبعد تاني عارفه انك بتكرهني اكتر من اي حاجه في حياتك بس اعمل اي حاجه و انا اسفه و انا هعمل كل اللي انت عاوزه بس متسيبنيش و قالتلي انها كانت لسه بتكلم الولد ده علشان كانت خايفه يتصل علي امها و يعملها مشكله طبعا كدبت كلامها و قولتلها مش مصدقه متحاوليش و اتفقنا علي كام حاجه و كده و هي سلمتلي الولد ده و انا انصرفت معاه و كنت باخد حقي منه هو مع أن كان المفروض اخد حقي منها المهم خلص الموضوع علي اني أنا و هي نكمل بصراحه معرفتش اعمل ايه لما اغمى عليها مكنتش متوقع أن يحصل كده فمسيبتهاش يومها علشان خوفت يحصلها حاجه و رجعنا بس انا مش بنفس الشغف و متابع حياتها من قريب قريب جدا و مراقبها و مراقب تليفونها و خدت كل احطياتاتي و حصل بينا كذا مشكله برضو بعديها كبار و حليناها و لاكن كنت أنا حرفيا اللي بتئذي دايما عمري ما قبلت أنها تبقي في مكاني مهما يحصل عدت شهور و ايام و انا و هي في نص سنه تالته ثانوي و كنا بتنزل نشوف بعض كتير و نخرج و لاكن كنا محافظين و انا كان كل اللي في دماغي اني مسيبهاش تبقى حد وحش كنت بعاملها زي بنتي عمري ما سببتها زعلانه و بجد بجد حبيتها من كل قلبي و هي دايما كانت بتقولي أنها بتحبني برضو و لاكن مش باخد علي كلامها اوي لدرجه ان حصل كذا مشكله علي الموضوع ده و اني مش بثق في كلامها و هي متعرفش أن أنا المهم عندي بس انها تبقى قدام عيني و كويسه و لاكن رغم كل ده كان فيه موضوع شاغل دماغي دائما و هو أن ربنا عمره ما يكون راضي علي علاقه كده ابدا بعد الفتره دي كلها هي اتحسنت كتير و قدام عيني و انا متاكد من ده لاني بعديها عن اي حد ممكن كان ليه تأثير وحش عليها صحاب سوء و كنت بتابع صلاتها و علاقتها مع اهلها و كل ده و هي اتحسنت كتير اوي اوي و الحمد لله بقت شخص كويس الحمد لله جينا عند شهر واحد اللي فات و فتحت نفس الموضوع القديم هل ربنا هيرضى عننا كده ؟ فتحت الموضوع معاها و كانت هي المرادي متفاهمه ده اكتر و كانت فعلا بتفكر من منظور ديني و اتفقنا أننا تقفل كلام لغايه ما ربنا ييسر و اجي اتقدملها رسمي حاليا معرفش حاجه عنها نهائيا غير اني بشوف ريبوستاتها علي التيك توك و بس و ربنا الحمد لله هداها الفكره أن أنا كل فتره برجع اعيش في قديم و انا ايه اللي أنا عملته ده ازاي قبلت علي نفسي اني ارجع لها تاني المفروض مكنتش عملت كل ده أبدا و من ناحيه تانيه بقول كويس اني كنت سبب لحقها من كل ده بعد ربنا و لاكن بعيش في الفكره الاول اكتر و بخش في حالات وحشه زي افرض ده كله حصل تاني كل ده يروح علي الفاضي!! أنا قصرت في مذاكرتي جامد و من بعد ما قفلنا كلام مع بعض و انا ضايع بس الحمد لله مش ضايع بطريقه اكره نفسي فيها و لاكن مبذاكرش مبخرجش من البيت صحابي مبقوش قادرين يفهموا طريقتي و ده كله مش فارقلي بس انا في دماغي ٣ افكار ١ البنت بتاعت السله دايما بقول لنفسي اني اذيتها مع أن هي اللي كانت دائما يتقرب مني و قولتلها كذا مره اني مش بحب و مش هحب بس دايما حاسس بذنب اكني أنا عشمتها مع أنه محصلش و بصراحه ساعدتني في حاجات كتير اوي و حبيتها كصاحب عمري ما هلاقي زيه تأني و لاكن بعدنا و انا مش هرجع تاني ابدا ولا هحاول حتي هو مجرد تفكير ٢ البنت الأولي طيب افرض اتعرفت علي حد افرض رجعت تاني للاوحش افرض نسيتك بعد كل ده طيب هي كويسه ولا لا طيب هفضل عايش علي حلم عمره ما هيحصل و ممكن تبقى هي نسياني اصلا ٣ هو أنا ليه عملت كده هل انا غلطان اني رجعتلها تاني و سامحتها علي كل ده هي عملت كل حاجه تقدر عليها علشان تعتذر مني علي كل اللي حصل و لاكن برضو ليه انا عملت كده ليه رجعتلها و ليه دوست علي نفسي جامد كده و اوقات بتوحشني ايامي لما كنت اعرف ناس هنا و هنا و بنات هنا و هنا و ايام كوره السله و البنت بتاعت السله الفكره أن بعد ده كله أنا مش عارف اعيش في سلام ابدا كل ما افتكر حاجه من اللي حصلت بخش في حاله وحشه اوي و بنعزل اكتر في اكتر بحاول دايما اقرب من ربنا و بنتظم علي صلاتي و هظفي اني مغضبهوش ابدا و اعمل كل اللي يرضيه مش عارف انا ليه كده و ايه اللي عملته في حياتي ده حتى كان في وجودها كانت هي اللي مهامه بمذاكرتي و متابعاني و انا علشان بحبها كنت مهتم بمذاكرتي و لاكن من ساعت ما هي مشيت و انا ضايع في مذاكر أنا يمتحن الايام دي و انا خايف تكون شيلت فيزيا و خايف و متضايق من درجاتي اللي هجيبها و أن حلم الجامعه اللي نفسي فيها حاسبات و معلومات هتروح مني و امي هتدايق اوي لأنها بتحبني و ابويا هيدايق لانه مش هيقدر يتباها بيا و هيزلني طبعا بفلوس الدروس بتاعت السنه كله اسف علي الاطاله و لاكن معرفش قولت احاول اكتب المرادي لو وصلت لهنا بطلب منك تدعيلي دعوه من قلبك يمكن ربنا يصلح من حالي و يحسن من نفسيتي و شكرا و اسف مره تانيه علي كل ده و عارف ان مهما كان كل اللي حصل ده كان حرام و علشان كده أنا حاولت اعمل الصح متأخر اه يمكن و لاكن عملته الحمد لله ...عرض المزيد

4 الدعم

2 نصيحة

عندي مشكله في الخطوبه وتردد رهيب في اختيار شريكة حياتي

انا عندي مشكله ولو حد ينصحني بحاجه ممكن اعملها انا كنت خاطب من يجي سنه ونص كده والبنت الي كنت خاطبها كانت حد كويس هي واهلها كمان لكن كان في بعض الحاجات الي مكنتش حاببها في شخصيتها مع وجود مقارنات عندي كانت عاليه اوي وصلتني اني معرفتش اكمل معاها وانا دلوقتي من ساعتها وانا بحاول اخطب ومش عارف ألاقي حد مناسب وعندي تردد رهيب وتحليل فظيع لأي بنت بقعد معاها بيخليني اوصل اني مكملش بعد اول قاعده معاها وده معطل ليا جامد في حياتي وحاسس ان ظلمت البنت الي كنت خاطبها علشان كده ربنا بيعاقبني في الي انا فيه ده وبحاول ادعي ربنا كتير لكني مش موفق في الامر ده خالص وحاسس الموضوع بيزداد تعقيد كل شويه والناس حوليا زهقوا مني وبيحسوا اني معقد وجزاكم الله خيرا مقدما ...عرض المزيد

4 الدعم

6 نصيحة