انا انطوائيه جدا جدا بطريقه اوڤر، من وانا صغيره مكانش عندي صحاب ومفيش بنت كانت بتحب تصاحبني ويقعدوا يتريقوا عليا، ويقولولي اني رغايه وانا مجرد طفله عايزه تتكلم وتلعب زيهم، كل ما اكلم حد يسكتني، حتى المِس بتاعتي كانت تطلب مننا مثلا نعمل نشاط معين وانا كنت بحب اتكلم معاهم تروح المِس مقوماني وتخليني واقفه بعيد عنهم وتصورهم وتهزر معاهم وانا واقفه اتفرج عليهم وهما بيرسموا ويلونوا ويهزروا، مكنتش بحكي حاجه لاهلي لأنهم كانوا دايما يستخفوا بمشاعري، بعدت عن كل الناس وبقيت مع نفسي، واتعلمت حاجات كتير وفهمت حاجات كتير بدري اوي ومش في وقتها، دلوقتي انا في ثانوي ولسه انطوائيه ومعرفش حد. رغم كدا شخصيتي مش ضعيفه لأني شوفت كتير واخدت دروس كتير في حياتي، بعامل كل الناس بطريقه كويسه وزي ما انا احب انهم يعاملوني، وكل الناس تشهدلي اني بنت كويسه ومحترمه، ومع ذلك معنديش اي صحاب وعلاقتي بزمايلي في المدرسه او الدروس سطحيه ويادوب على قد الدراسه، وردي بيبقى على قد السؤال، مبعرفش اتكلم ولا افتح مواضيع ومعرفش لو الشخص الي قدامي حابب اصلا اني اتكلم معاه ولا لا عشان كدا بسكت. عشان كدا بردو بكرهه المدرسه لأني بروح ببقى قاعده لوحدي طول اليوم وببقى شايفه كل البنات بيتكلموا وبيهزروا وببقى حسه اني اقل منهم ومنعزله عنهم، تخيل الروتين ده بقى كل يوم، انا حتى اول يوم مدرسه السنه دي روحت البيت قعدت اعيط وانا شحطه كدا!. طالما الناس كلها شايفاني كويسه ليه محدش بيحاول حتى نبقى صحاب؟ ايه الغلط فيا ايه مشكلتي يعني؟ انا بجد بتعب من التفكير، انا مش بكره ابقى لوحدي بالعكس انا بحب كدا لكن لما بفتكر قد ايه انا وحيده طب اشمعنى انا؟ ايه العيب الي فيا يخلي محدش عايز يقرب مني حتى اهلي؟ حسه بقى فيا بلاده، وشي اختفت منه التعابير والرياكشنات

7

17