أنا مش كويس… بس شكلي حلو في الصور. بضحك… بس بدماغي صوت بيقول "انت مكسور بس محدش فارق معاه". أنا حرفيًا في مرحلة لو وقعت من الدور العاشر… الناس هتقول: "هو كان بيشتكي؟ طب ماكانش باين عليه!" أبويا بيكره أمي… وأمي بتكرهه أكتر، واللي بينهم؟ أنا… اللي طالع فيهم كراهيتهم لبعض، وباخدها كل يوم على هيئة صمت، وزعيق، ونظرات اتهام. بيتنا بقى زي المصيف في الشتاء… كله بارد ومحدش عايز ييجي عليه. جيت أحب… قلت يمكن ألاقي دفا، لقيتني بتحب عليّا، وبتدعيلي بالسعادة وهي في حضن واحد تاني. كنت بفكر أفتح قلبي… لقيت مفيش قلب أصلاً، اللي كان موجود اتفرم واتنشف وتحط في برطمان ذكريات واتباع في أوضة الكراكيب. أنا مش زعلان… أنا فاضلي غلطة صغيرة وأبقى كارت ميموري فاسد، الكل يستخدمه… بس أول ما يفتحه يلاقي جواه "ملف تالف". بس متقلقوش… هفضل أقول "أنا جامد" وأضحك، وأهزر، لحد ما حد فيكوا ياخد باله إن كل الضحك ده مجرد وسيلة محترمة شوية للانتحار البطيء.

1

2