أنا مش ضعيفة.. أنا موجوعة بس ساكتة" أنا بنت عدت على حاجات كتير محدش يعرفها، ولا اتكلمت عنها. اتربيت في بيت ماكنتش فيه الكلمة الحلوة عادة، ولا الاحتواء كان أساسي. كبرت وأنا بحاول أفهم أنا غلطانة في إيه؟ ليه مفيش تقدير؟ ليه لازم أفضل ساكتة عشان الناس ترتاح؟ تخرجت من كلية تعبت فيها، وكنت فاكرة إن دي بداية لحياة أحسن، لكن لقيت نفسي واقفة في مفترق طرق، مش عارفة أبدأ منين، وكل ما أحاول أتحرك، الدنيا تشدني لورا. مشكلتي مش إني مش عايزة أتحرك، مشكلتي إني مش لاقية باب مفتوح، ولا كلمة تطمن، ولا فرصة أحس فيها إن ليّا مكان. أنا عندي طاقة، وعندي حلم بسيط: أشتغل، أعيش بكرامة، أكون مستقلة، ألاقي ناس تحبني وتفهمني من غير ما أشرح كتير. أنا مش طالبة المستحيل، أنا بس عايزة أعيش حياة فيها أمان، وناس فيها ضهر مش حمل. بكتب ده مش عشان أشكي، بس يمكن في حد زيي، حاسس بنفس الوجع وساكت. ودي مش نهاية.. يمكن تكون بداية، حتى لو البداية دي مجرد كلمة "أنا تعبت".

4

20