في العشرينات، بقيت الحياة مسابقة سرعة. كل الناس بتجري... واحد بيحوش، واحد بيعمل جمعية، واحد بيجهز للسفر، واحد بيحفر في الصخر علشان بس يثبت لنفسه إنه مش ضعيف. المقولة الرسمية: "ده سن السعي، لو ما سعيتش دلوقتي، هتسعى إمتى؟" طب واللي مش قادر يسعى؟ اللي صحى من نومه منهك، من غير ما يعمل حاجة؟ اللي مش شايف معنى في كل الجري ده؟ اللي بيحاول يصدق إنه مش عيب إنه مكتئب؟ بقى المطلوب منك تشتغل، وتكافح، وتتحمل، وتعدّي، بغض النظر عن حالتك النفسية، وضعك، ظروفك، دماغك فيها إيه. طب هو أنا آلة؟ هو لازم أكون تمام علشان أعيش؟ ولا أعيش علشان أكون تمام؟ امتى بقت الراحة ترف؟ والحزن ضعف؟ والتعب حاجة لازم تخبيها علشان "ما تتأخرش عن الركب"؟ وهو الركب ده رايح فين أصلاً؟ ومين قال إنك لازم تركب معاه؟ اللي مش قادر يجري مش فاشل، اللي واقف مش لازم يتحرك دلوقتي، واللي تايه مش شرط يكون ضايع. يمكن محتاج وقت. يمكن محتاج نفسه. يمكن محتاج بس يسمع السؤال ده: إنت عامل إيه بجد؟

4

0