انا حرفيًا في موضوع بستغرب منه جدًا، وهو النسوية والذكورية، بجد اكتر حاجة بتعصبني في الدنيا وبتخلي دمي يفور من الجهل والسطحية اللي انا بشوفه، واحدة تطلع تقولك "انا مش محتاجة راجل! كلهم خونة" وواحد يطلع يقول على البنات نفس الكلام، وده بيدل على جهل شديد او عقد نفسية تخليك تعمم على الناس كلها من حالات فردية لا تمثل الواقع او المفترض، وبيقعوا في مغالطة التعميم المفرط بشكل يخليك تضحك زي المجنون على هبلهم، والاتنين بيبقوا عايزين الطرف التاني عبد عندهم (إلا من رحم ربي) يعني الست تبقى عايزة الراجل يمضي على قايمة حتى لو هو اللي مجهز الشقة كلها بداعي انها تضمن حقها! طب وهو مين يضمن حقه؟ ولا هو اللي شيطان وانتِ اللي ملاك؟ ونفس الكلام للراجل اللي مقتنع انه لازم الست تشتغل وتصرف معاه على البيت او يتجوز عليها وهو غير مقتدر للجواز باخرى، هو انت متعرفش معنى القوامة؟ طب متعرفش (وان خفتم الا تعدلوا فواحدة)؟ ده العيل اللي في تالتة ابتدائي بيبقى عارفهم! ونماذج بقى كتير من دول بس في مواضيع مختلفة، فاللي زي دول مش عايزين حقوق زي ما بيقولوا لك، هما عايزين امتيازات، عايزين الطرف التاني يبقى عبد عندهم مش شريك ليهم! انا مش بقولك اتنازل/ي عن حقوقك، بس اعرفها وخدها بالظبط مش اكتر ولا اقل وفي نفس الوقت ادي حقوق الطرف التاني بالظبط مش اكتر ولا اقل، لان النماذج اللي انا شرحتها دي حتمًا ولابد لما يلاقوا شريك حياة مناسب مش هيفكروا مرتين! وهتلاقيهم منزلين بوستات زي "اعظم انجازاتي" وانت قاعد اعزب بتقرأ البوست وحاسس انك مغفل اخدت على قفاك من شوية منافقين بيبيعولك وهم، فاللي عايز اوصله ان الجواز "شراكة" مش "مين عبد عند التاني". ربنا قال (وجعلنا بينكم مودة ورحمة)، "مودة ورحمة" مش "محاكم الاسرة والتمرد"! واعيد واكرر تاني للي هيخش يكتب "بس في رجالة بتعمل كذا" او "في بنات بتعمل كذا" ان دي حالات فردية ولا تمثل الواقع او المفترض

2

2