يمكن لما حكيت لها عن نفسي، وقلت إني خريج كلية كويسة وبعافر كل يوم عشان أصرف على بيتي وأمي وأبويا، حسيت إن ده قربني منها. يمكن هي شافت فيا إنسان صادق وبيكافح رغم الظروف. بس مع الوقت اكتشفت إن اللي جوايا مش حب ناضج زي ما كنت متصور… ده كان تعلق. التعلق ساعات بيبقى زي قيد يربطك ومش يخليك تعرف تشوف حياتك من غير وجود الشخص ده. وأنا لما ابتديت أفكر بجد في مستقبلي، لقيت إن ده مش صح. لقيت نفسي متعلّق بيها تعلق مرضي، مش بيبنيني، بالعكس بيخليني واقف في مكاني. ومعرفش نيتها إيه. يمكن كانت شايفاني مجرد زميل بيشارك همومه، ويمكن كانت عارفة مشاعري وسايبة الموضوع يعدي. الحقيقة إن الإجابة عندها، مش عندي. وأنا مش عايز أعلق نفسي بحاجة مش واضحة. الأصعب إني في لحظة غضب قلت لأمي كلام مش حقيقي علشان أكرهها في البنت، وضحكت على أمي وقلت إنها عندها أكونت في برنامج مشبوه… وأنا كنت عارف إني بكدب. كدبت مش عليها بس، كدبت على نفسي كمان، ولسه مستمر في الكدب ده جوايا. أنا مش عايز أكون نقطة سودا في حياة حد، ولا أبقى سبب في وجع إنسانة تستحق تفرح وتعيش حياتها. يمكن أنا مش مناسب ليها، ويمكن هي مش مناسبة لظروفي. ربنا أدرى بلي يصلح. عشان كده بقول: يا رب أنساها. مش من قسوة، لكن من رحمة. يا رب افتح لي باب لمستقبل أوضح، وحياة أبني فيها نفسي بجد. لأن الحب الحقيقي بيبني، لكن التعلق المرضي بيهدم… وأنا اخترت أبني.

2

1