بخاف أبقى تقيل على صاحبي ومش عارف أتكلم

Question

دلوقتي انا ساعات بحس نفسي تقيل علي واحد من اعز صحابي فا ابسط مثال يعني انا بحب اقعد معاه كتير جدا فا ببقي عايز انزل معاه و هو بيبقي مش عامل حسابه فبقله انزل و انا هحاسبلك و اكتر من مره بعملها و هو بيردهالي ساعات بس من نحيتي اكتر فا انا ساعات بحس انه ممكن يتضايق انا متردد ابعتله اقوله ان لو انا تقلت عليه في يوم يقلي عشان مبقاش تقيل و لا اسكت و متكلمش عشان انا شخص باخد بالي من ادق التفاصيل و غصب عني و كده

دلوقتي ابعتله و اقوله ان لو حس في يوم اني تقيل عليه يعرفني ولا هتبقي شكلها وحش و غريبه

Strawberry_25620 🇪🇬 · Accepted Answer

اعز صحابك؟ يبقا تواجهو عادي علاقتكو اعمق من انك تشيل في قلبك حاجه وتبقا متضايق وخايف كده علطول .. لازم دايما تتكلمو في الامور اللي بتضايقكو او شاغله دماغكو مع بعض عشان تعرف تبقا على طبيعتك معاه

Pistachio_56152 🇪🇬 · Answer

لما تنزلو مش لازم تروحو اغلي مكان  .. شوف المكان الي علي امكانياته او اقل وخلي ده ديما قعدتكم هناك سواء هو حاسب او انت مش فارقه

Apple_59652 🇪🇬 · Answer

ما هو احنا بنروح مكان مش غالي اوي بحك اننا ساكنين في مكان اقل حاجه بنزل نشربها بتبقي 70 ج مش مبلغ + هل عادي اقوله لو حس اني تقيل عليه يقلي ولا هتبقي جمله مش مريحه و غريبه

Strawberry_58478 🇪🇬 · Answer

بالعكس لو صحبك بجد ومن زمان مش هايضايق انا كدا مع صحبتى من ايام ابتدائي مفيش فرق ابقا اقوله عادى علشان تشيل من دماغك الفكرة دى ولما تتجمع مش لازم تروح اماكن غاليه عادى

Apple_59652 🇪🇬 · Answer

مش عارف هل ده هيعمل اختلاف ولا بس احنا صحاب مش من اوي و غير اننا شباب بس انا عندي وسواس و غير انه يعتبر صاحب قريب مني فشخ ف هل عادي اقوله انه لو حس اني تقيل عليه يقلي ولا هتبقي جمله غريبه

Strawberry_58478 🇪🇬 · Answer

هو لو مضايق او انت متقل عليه فعلا مش مجبور انو ينزل معاك ابسط حاجه هايتهرب منك وهو مش بيعمل كدا

Pistachio_56152 🇪🇬 · Answer

انت كده بتحرجو اكتر

Hazelnut_52786 🇪🇬 · Answer

لو صاحبك من زمان قولو عادي . او بلاش الاماكن المكلفة وريح دماغك

Banana_18947 🇪🇬 · Answer

بص بما إنك بتتكلم في حاجات بسيطه فامش لازم تقوله ، حاول بس انت عموماً متركزش أوي في حاجات ملهاش لازمه علشان التفكير الزياده بيهلك
وممكن في مره مثلا تقوله تعالي نتقابل هعزمك ع حاجه نشربها كده يعني 
وحاول متخليش أي حاجه صغيره تاخد من تفكيرك مساحه كبيره ع الفاضي هدي نفسك خالص وخود نقس عميق ، ووصل لدماغك ان الدنيا بسيطه
وكمان انت قولت انك بردو بتعزموا فاعادي وهو لو مش عايز يعمل ده مكانش هيعمل فاهم