مش قادر اتأقلم علي الكليه.. تايه في الوسط 💔

Q: بدور على دكتور نفسي مجاني عشان حياتي بضيع

السلام عليكم حد يعرف دكتور نفسي مجاني عشان انا حياتي بضيع لا بقيت بحس ولا بقيت بشوف مصالحي ولا عارف اتحرك من مكاني حتي العياط مبقتش عارف اعيط وتايه الموضوع مأثر علي حياتي وطبعا مش عايز اعرف اهلي فا لو حد عارف دكتور نفسي بس يفمني لو كان عندي حاجه ولا لا عشان الحزن مأثر علي حياتي اوي

Q: محبطه وفاقده الأمل - أحكي عن مشاعري

محبطه وفاقده الامل

Q: زهقان مرعبه وعايز أتخطى حياتي.. إيه الحل؟

انا عايز اتخطى حياتى اعمل Skip بجد يمكن الاقى حاجه مهمه او تشدنى شعور انك عارف ناس كتير ومحدش قريب منك دا سئ انا بقيت عايز اختفى من حياتى يمكن تكون احسن والله الفكره انى راضي و الحمدلله على كل حال و عارف ان اى حاجه بتحصلى هى الخير من ربنا وانى اكيد فى نعمه بس انا زهقان لدرجه مرعبه و مش عارف اعمل ايه او ايه اللى يخرجنى من الحاله دى

Question

بقيت بستني اليوم اللي مبنزلش فيه الكليه أو اليوم اجازه أو يوم اطنش ومنزلش مش كسل أو حاجة والله بس حاولت كتير احب مكان اتفرض عليا ومعرفتش      حاولت احب الكليه اللي عمرها ما كانت ف دماغي بس مش عارف مش عارف اتأقلم ع الناس مش عارف اتأقلم علي المكان مبقتش قادر اقعد دقيقه هناك نفسي اروح اي حته بس المكان ده لا انا خسرت مكان كان نفسي ابقي فيه ومش عارف اتعود علي مكان بقيت فيه ف بقيت عباره عن شخص تايه في النص كأني في وسط البحر ولا شايف الشط ولا عارف اعوم 💔

Biscuit_28797 🇪🇬 · Accepted Answer

حتي كونت صحاب جوا برضو بس مش مرتاحة معاهم ولا بعرف اتعامل معاهم حلو بحسهم بيضغطو ساعات عليا اكتر و اما يوم مش هننزل فيه بحس ارتحت عشان يوم اخيرا مش هتضغط فيه مش عارفه ايه الحل حقيقي المفروض الكلية كانت تبقي ايامها حلوة و ذكريات ليه بس متجيش للواحد و هو مرتاح

Biscuit_28797 🇪🇬 · Answer

دي حقيقة بجد انا كمان روحت مكان مش عايزاه و اديه مفروض مش هقول كان المفروض اذاكر اكتر او انجز لا بجد انا شايفة اني عملت اللي عليا و زيادة و مش اقل من اي حد جوا ولا في فرق يمكن اكون احق كمان من ناس جوا بس اهو الحمدلله و خلاص اللي عايزه ربنا هيكون

Grape_22054 🇪🇬 · Answer

فاهمك عمتا لاني اعرف ناس جوا والمكان اللي انا كنت عاوزه كل شويه بيحصل فيه ايفينت وبيتجمع فيه كل الكليات وكل صحابي يكلموني يلا نروح وانا كل مره بحجه شكل لاني جربت اروح مره بس حسيت بانكسار غريب قاعد مش مركز قاعد ببص للسقف بتاع المكان ببص للحيطان ببص للابواب والأهم ببص للناس الي في المكان طب هو مش انا أحق اكون مكانهم مش مفروض اكون هنا اي اللي خلاني مبقاش هنا انا كان حلمي ابقي هنا

Grape_22054 🇪🇬 · Answer

عارف ان الكليه مش نهايه المطاف وعارف أن شهاده الكليه مبقتش تشغل دلوقتي كلو بقي كورسات وتعب وشغل علي النفس 
بس اللي عارفه أن محدش حاسس بيا غير اللي جرب الي انا فيه لأن الموضع عمره ما كان ف شغل ولا حاجة الموضوع ف مكان انت حابه مكان انت مكنتش شايف نفسك غير فيه ومش عارف تشوف نفسك غير فيه مكان كان نفسك تقضي فيه سنين جايه بحلوها وبمرها

Biscuit_28797 🇪🇬 · Answer

حصل بجد بيحصل ايفنتات كتير برضو هناك مبروحش انا المكان اللي انا فيه احسن عشان مبحبش الولاد بس حتي الكلية اللي عايزاها حتي القسم مفيش بقي اي حاجة و مفيش حل اروح هناك و لو حولت مفيش فايدة و حوار

Biscuit_28797 🇪🇬 · Answer

انا حاسة بيك حتي لو مكنتش هشتغل بيها و هقعد ف البيت بس ع الاقل اكون درست اللي بحبه و لقيت شغفي و جربت حاجة بحبها و نفسي فيها و انا  اصلا ف مكان مش بحبه ليه اتعبله و اخدله كورسات و انا مش بحب الجو ده ف صعبة بجد

Durian_52455 🇪🇬 · Answer

انت لسه محبوس جوا الكلية اللى كان نفسك فيها!
مش قادر تقاوم فكرة إنها مش ليك ومش نصيبك
نصيحتى ليك.. انك تستسلم لقضاء ربنا وترتيباته 🕊️

Durian_52455 🇪🇬 · Answer

وكدة كدة احنا فى عصر مميز بـResearch "بحث"
تقدر تتعلم اى حاجة انت عاوزها فأى وقت ومن أى مكان.. العلم دلوقتى بقى أسهل بكتييييييير

المهم إنك تمسك العصاية من النص وتحاول توازن مابين اللى مفروض عليك ومابين اللى انت نفسك فيه.
حتى التعليم الأكاديمى اللى إنت رافضه بسبب مجال الكلية.. هيفيدك فى يوم من الأيام

اى حاجة بتتعلمها عامةً ليها قيمة وتأثير بس مش شرط دلوقتى!
ربنا يوفقك ❤️

Grape_22054 🇪🇬 · Answer

مانا بتعلم وهكمل تعلم الي كان نفسي بس الموضوع عمره ما كان دراسه  فاهماني الموضوع  قاسي في حته اني اتعلقت بمكان ولما بقيت بشوفه من بعيد وبشوف الناس اللي فيه ايوا والله هيا دي الناس اللي شبهي انما انا في مكان وحيد مش عارف الاقي حد شبهي حتي صحابي ف المكان الجديد غصب عني مش عارف اتأقلم معاهم وحتي صحابي شله عمري ببقي قاعد وسطهم مضايق كاتم جوايا مكسوف ليه كلهم كل واحد فيهم دخل الكليه الي كان بيتمناها

Grape_22054 🇪🇬 · Answer

اكيد مش بحقد عليهم والله بس اشمعنا انا ابقي الوحيد اللي مش سوي نفسيا بسبب الي حصل ليه ابقي الوحيد اللي مش قادر استحمل المكان اللي انا فيه

Durian_52455 🇪🇬 · Answer

اقرا آخر جملة انا كتبتها فى أول تعليق