كنت لسة بعمل قهوة و سرحت و سيبت المطبخ و كنت بكتب في النوت بوك بتاعتي عن شيء ما و القهوة فارت جريت بسرعة ألحقها لكن كان فات الأوان و هنا افتكرت مرة كنا بنتكلم و كان بيعمل قهوة علشان يبدأ يذاكر و كنا بنتكلم و خدنا الكلام لحد م القهوة اللي كان بيعملها فارت برضو افتكرت الموقف و كلامنا اللي خلاه سرح و نسي القهوة، كنا حلوين اوي مع بعض و يعز عليا أقول كنا والله مجرد اني افتكرت بس خلى عندي احساس اني عايزة ابكي فعلا و انا بعترف بحاجة دلوقتي و هي إن صحيح انا مش عايزاه ليا و مش عايزاه ف حياتي بس كل م يجي ف بالي انه مع حد تاني بغير و بتضايق الحقيقة انا مش فاهمة السبب بس انا عايزة اتخلص من الشعور ده بس مش عارفة ازاي و مش هكون قاسية مع نفسي لإنها متستحقش ده و هديها وقتها و مساحتها و هعامل نفسي برحمة اكبر مما كنت بتعامل معاها قبل كده لإن اللي وصلت ليه ده مكانش بالساهل ابدا ف انا مش هضغط عليها انها تنسي او تبطل تفكر او او او .... كله بوقته و كله بأوانه زي م انا وصلت للي انا فيه حاليا و مكنتش اتوقع ف يوم اني استغنى عن اكتر شخص حبيته و اديته من مشاعري و من نفسي و روحي و وقتي و سنين من عمري بس استغنيت مع شوية حاجات كده هتروح مع الوقت و الإنتصار فعلا إني منساش لإني مش هقدر انسى لكن الانتصار اني مبصش ورايا تاني ولا ابص حواليا و ادور على حد او على ذكرى او اي شيء يخلي سيرته تكون معايا و انا هتأكد اني تخطيت بشكل تام لما اشوفه و أشعر باللا شيء لما قلبي نبضه ميزدش و اعصابي متسيبش و اقدر اركز في طريقي كإنه شخص عادي زي اي حد في المكان اللي انا موجودة فيه وقتها هتأكد اني تخطيت و انه فعلا لا يعني لي شيء..

1

4