سلام ..شكرا مقدما على قرائتك لمشكلتي. انا يا جماعة الخير تعبت من عائلتي يعني بابا جد متشدد وانا طبعي طموحة وعندي ياسر احلام حابة نحققهم لكن للأسف في المنطقة لي نسكن فيها ينتهجو سياسة القطيع عندهم الطفلة توصل سن معين لازم نتزوج مش مهم الشخص مناسب او لا أي شخص يدق بابها تتزوجو والسلام وانا هذي ما قدرتلهاش كملت الماستر عندي تقريبا 6 سنوات ولي خطبوني مش مناسبين ليا فرفضت الزواج طبعا أمي وخويا اعتبرونيي متمردة لاني ما قبلتش ندي شخص مش مقتنعة بيه اما بابا الحمد لله ما دخلش في الموضوع هذا ، اما من جيهة اخرى الوالد قافل كل السبل اني نتحرك ولا نخدم ولا ندير ديبلوم نزيدو ل cv تاعي, بحكم المنطقة لي نسكن فيها بعيدة شوي على وسط البلاد فبابا عندو ممنوع نخرج ولا نروح في ترونسبور الا اذا احتجت حاجة حتمية تاع طبيب ولا نشري حوايج ناقصيني هو يديني بسيارتو وهو يرجعني انا ظرك حاسة عمري ضاع راني في 30 سنة وما قدرت ندير والو دائما في الدار كاني محبوسة الحمد لله عندي شويا مواهب نعمر بيهم الفراغ لي عندي ( نقرى كتب ونخيط نخدم اكسيسوارات )اما كي نتفكر بلي راني لظرك ما درت والو نخاف هو صح الحمد لله عندي امل في الله انو قادر يغير حالي في لحظة اما نعرف أنه لازم الاتخاذ بالاسباب والسعي وانا مش عارفة كيفاه نسعى حاسة روحي مقيدة ونسيت ما قتلكومش اني مش اجتماعية عندي فقط صديقتي واحدة من ايام الجامعة وصفر اصدقاء في السوشل ميديا ما نعرفش نكون صداقات ولا عندي الجراة نحكي مع حتا شخص، وحلمي نبعد على لونتوراج لي راني فيه ونكون نفسي بنفسي حتا اذا متاخر. ظرك لي عندو فكرة يقدر يفيدني كيفاه نقدر نحاول نبدل حياتي ولا منين نبدى لانو تعرفو كي تكون انت لي في الوضع تغيب عليك الافكار وما تعرفش تخمم. اترقب ارائكم بكل امتنان.. 🥰

6

8