السنة دي انا في اولى ثانوي وبدأنا بقالنا اسبوعين وشوية، مش هقول اني عندي مشكلة في المذاكرة مثلا او في الدراسه ذات نفسها انا عندي مشكلة في البيت من لما دخلت اولى ثانوي وانا بقيت في دروس كتير برجع من المدرسة الساعة واحدة وبروح الدروس برجع تسعة ثمانية بالليل ومعنديش اي اجازات غير اربع وجمعة دول اليومين اللي مش بعمل فيهم اي حاجة نهائي وبرتاح من ضغط الدروس لإنها بتكون في سنتر والسنتر بيكون توتر وزعيق وزحمة وامتحانات شهرية وإلى آخره مشكلتي هنا إن خالي دايما بيتخانق معايا على حتة اني مش بنضف البيت و متفتكروش انه كبير هو عنده تقريبا حوالي 26 سنة ؟... مش فاكرة بس المهم المنهج بتاعنا جديد ومحدش على اليوتيوب او على المنصات بينزل فيديوهات كتير واحنا لسة مخدناش دروس كتير عشان نذاكرها فانا مش شادة حيلي في المذاكرة اوي عشان متعبش وعشان زي ماقلت مفيش حاجة تتذاكر او كتب حتى خالي عنده مشكلة في الحتة دي برضو وبيقول انه شايفني فاضية ومش بذاكر ومش بعمل اي حاجة فيقوم ضاغط عليا، معنديش مشكلة اروق انا شخص بيحب التنظيم جدا وساعات بروق من غير ماحد يقولي لإني مبحبش اقعد في بيئة مش منظمة انا بس مبحبش ضغطه عليا بمعنى أصح وإنه مش فاهم إني بمر بتعب جسدي في الدروس اللي بروحها كمان برجع بالليل ببقى فاصلة جدا وتعبانة ومبقدرش افكر فمش هقدر اذاكر فبذاكر لما احس اني فعلا عندي طاقة لكدا لإن لو غصبت نفسي مش هركز اصلا وزي كإني مذاكرتش أي حاجة، كل ما ندخل في نقاش يزعق ويسكتني بالكلام وانا مبقدرش ارد عليه عشان لو رديت هبقى قليلة ادب بالنسباله واني بجحة وإلى آخره، فانا مش عارفة اعمل ايه بس تعبت من الحال دا، يعني الموضوع هادي شويتين ولكن انا اتضايقت لإني من يومين بالظبط كنت بعيط طول اليوم بسبب الضغط مقدرتش اوقف عياط غير على بالليل يمكن كلامي مش مترتب وعشوائي وهتحسوا ان مفيش مشاكل للدرجة دي بس المنهج اصلا بكالوريا مش ثانوية عامة وفي مواد كتير مش زي ثالثة اعدادي مثلا انا لو بالفعل فاضية وبقعد في البيت دايما مش بروحمدرسة او دروس كنت قلت حقه يزعق بس هو دايما بيشخط في وشي على الفاضي ومبقدرش اتكلم لإن النقاش معاه عقيم بصراحة، انا برجع من دروسي بعد يوم طويل مليان بيهم تسعة بالليل فبكون غصب عني همدانة وجسمي تعبان، وهو بيجي ويكلمني بطريقة انا مش بتقبلها واكيد مش هتغصب عليا حاجة او اسلوب انا مش بتقبله، المشكلة فيه هو مش فيا لإني زي ماقلت معنديش مشكلة اروق بس هو يزعقلي على اساس ايه؟ دايما بيتحجج ان كل اللي في البيت برا في الشغل ولما بيكونوا برا انا يكون موجودة في البيت عادي واني مش تعبانة زيهم فانا بستغرب انه شايفني فاضية وسط ما انا برجع من دروسي تسعة بالليل مثلا وكمان بيبقى في تقييمات في المدرسة والتقييمات دي اللي بتبقى ماسكة درجاتی اصلا كلها في امتحانات اخر السنة يعني لو نقصت فيها هسقط والمدرسين بيقولوا كدا مع انها مجرد تدريبات يعني والمدرسين بيساعدونا فيها ولكن هي جزء من درجاتي النهائية عشان اقدر اطلع تانية ثانوي بكالوريا بإذن الله، فانا شخص ناضج وعارف مسؤولياتي كويس وهعمل ايه وهرتب ازاي وهذاكر ايه، طريقتي في المذاكرة متخصكش لإني ممكن اكون بذاكر قدامك بس لما انت تمشي بقعد العب يعني اضحك عليك وعلى نفسي واضرني انا في سبيل اسعادك ليه؟ مش مستنية حد يعرفني اللي المفروض اعمله في البيت، انا لو كنت لسة في تالتة اعدادي كنت هقول حقه يزعق لإني في تالتة مكنتش بروح المدرسة ومكنتش بروح غير درسين فمعظم وقتي ببقى في البيت فاضية ومش تعبانة فانا اقدر اروق، بس انا في اولى ثانوي وكبرت ومش محتاجة حد يعاملني كاني لسة عيلة، بس بحاول اسايسه عشان مبوظش اعصابي لإن نفسيتي كانت السنة دي اصلا بايظة ولازالت، لكن بحاول اخد كل حاطة بشويش عشان اركز اكتر في مستقبلي بدل العبط اللي بيحصل،ولما بحاول ابرر موقفي مش بيصدقني وبيضحك عليا وبيلومني لما اسكت في نفس الوقت فانا مبعرفش اعمل حاجة غير اني اقول تمام واقوم اعمل اللي هو عاوزه واقعد تاني، مش عارفة بحكي كل دا ليه لكن حسيت ان الموضوع بالفعل ضغط جدًا بصراحة.

2

3