الواحد مبقاش عارف يتأكد ازاي الأفكار والمعتقدات واحيانا المشاعر بتاعته فعلا ولا هو بدون ما يدرك متبني افكار ناس تانية وحاسس بحاجات مش حقيقية بس علشان ضغط البيئة حواليه ، كتر تعرضنا للسوشيال ميديا مثلا واننا يوميا بنشوف كمية ضخمة من الاراء اللي منها الصح والغلط بدون مقياس واضح يقولك ده ايه الصح فيهم وايه الغلط فتبدأ تاخد قرار على مين فيهم عنده رياكتات اكتر وناس اكتر بتشجعه والغريب ان كل ده بيحصل اصلا بدون وعي منك انت فجأة بتلاقي عقليتك واخدة اتجاه متعرفش وصلتله ازاي ومش من السوشيال ميديا بس من كل تفاعل اجتماعي مع البيئة حواليك. فيه دراسة اتعملت في جنوب أفريقيا علشان يشوفوا نسبة المراهقين اللي خاضو اول تجربة حب ليهم بناء على قناعة شخصية ومشاعر صادقة منهم، والنتيجة ان 100% من المراهقين دول نادمين على اول علاقة حب ليهم علشان اكتشفو بعدين ان ده مش مكانش قراراهم ولا مشاعرهم بجد بل بالعكس لما يفكر فيها الوقتي فكل حاجة وقتها كانت بتقول ان الخطوة دي غلط بس وقتها هو كان شايف البيئة كلها بتعمل كده والناس كلها بتسعى لكده وان ده "المفروض" يكون موجود لو انت عاوز تعيش فترة المراهقة بشكل طبيعي فبدون وعي خد الخطوة بمشاعر مزيفة علشان بس يحس انه منتمي للمجتمع. كملو على كده بقا كام حاجة احنا عملناها علشان نتماشى مع اللي حوالينا ونحس اننا جزء من البيئة اللي احنا فيها وكام حاجة بنفكر فيها وبنقنع نفسنا اننا مقتنعين بيها بس لمجرد ان ده السائد في اللي بنشوفه حوالينا الموضوع مرهق إلى حد ومش عارف اوصل لإجابة فيه

2

2