أوقات كتير بحس إني مش عايشة في شخصية واحدة بس، كإني جوايا كذا شكل بيتغيّر حسب اللحظة. فيا البنت المجنونة اللي بتحب كل حاجة غريبة ومختلفة، اللي ممكن تنجذب لأي حاجة مش معتادة ومش فارق معاها الناس هتشوفها إزاي. وفي نفس الوقت فيا البنت اللطيفة الهادية اللي بتحب تقعد مع نفسها، تقضي وقتها مع الهوايات البسيطة اللي بتخليها مرتاحة، زي القراية أو الرسم أو الكتابة. وبرضه فيا البنت المتدينة اللي بتحاول تقرب من ربنا على قد ما تقدر، اللي بتحب تعمل كل حاجة على أكمل وجه ودايمًا بتسعى تكون أحسن. يمكن الناس تشوف ده تناقض، بس أنا شايفة إن دي كلها جوانب مني، وكل واحدة فيهم بتكمل التانية. ساعات بحس إني محتاجة أعيشهم كلهم في نفس الوقت، وساعات بحس إني مش عارفة أنتمي لأنهي واحدة أكتر. يمكن ده طبيعي، ويمكن ده سر إننا نفضل نكتشف نفسنا طول العمر.

1

12