خناقات مع أهلي بسبب الشغل والدراسة.. أنا مين الصح؟

Question

طيب سؤال صغير عشان انا ف خناقات مع اهلي دايما بسبب الحوار ده 
انا دلوقتي شغال ف الماركتينج و بدخل دخل كويس بالنسبه لطالب 
و انا طالب ف هندسه و ده طبعا اثر عليا،و خلاني ادبلر سنه 
ف انا اهلي شايفين ان لا سيب الشغل و هندسه اهل و بتاع 
وانا شايف ان لا احاول انظم وقتي بس انجح ف الكليه عشان اخد شهاده و اكمل ف الماركتينج خصوصا انه ك مرتبات و فرص عمل افضل من هندسه

Banana_71311 🇪🇬 · Accepted Answer

اوعى تسيب الماركنتج طالما بيدخلك دخل كويس  انت الله يعينك انك في هندىسة اصلا انا مستحملتش فيها ترم و حولت على طب اسنان الفكرة ان كدة عندك مصدرين دخل متخسرش واحد عشان التاني

Blueberry_71889 🇪🇬 · Answer

من وجهة نظري
حاول فعلاً تنظم وقتك ممكن يكون صعب ومرهق بس الكلية كم سنة وتخلص لا تخلي شغلك يأثر علي دراستك والعكس كمان

Banana_38444 🇪🇬 · Answer

أنا عن نفسي بقول انك تنظم وقتك هو هيبقى صعب شويه في الاول لكن هتتعود بعد كده هي الكليه هتخلص وكمل في الي انت هتترتاح فيه

Chilli_71915 🇪🇬 · Answer

هحاول بس انت شايف ان الافضل ان لا اشتغل مهندس لما اتخرج وكده 
لان ده هيضطرني اني اسيب الشغل عشان اخد كورسات ف محال هندسه 
ولا اخليني ف المجال اللي انا الريدي بقيت ناجح فيه

Blueberry_71889 🇪🇬 · Answer

لو نجحت في مجال شغلك خليك فيه 
بس برضو مترميش الكلية ورا ظهرك لانك فيوم ممكن تحتاجها ومحدش يعرف الظروف
وفي الاخر لان دا قرار ممكن يغير مستقبلك كامل صل استخارة

Nutella_56618 🇪🇬 · Answer

شوف اللي بتحبه و مقتنع بيه و اعمله انت صح مش غلط .. انا عن نفسي شبهك كده خلصت اولى كليه علوم و للاسف شلت مواد و قررت أحول كليه إعلام عشان برضو اشتغلت في الماركتنج و الكوبي رايتنج و الفويس اوفر و حاسه أنه ده مكاني و طبعا عانيت عشان اهلي يوافقوا.. بس حياتك هتعيشها مره واحده عيشها باللي يريحك و تحبه

Jackfruit_61164 🇪🇬 · Answer

من وجهة نظري الاتنين سوى واوعى تسيب هندسه حتى لو مش هتشتغل بيها الهندسه هتعلمك كتير وازاي تفكر وهتطور من دماغك جدا

Pear_51536 🇪🇬 · Answer

حاول توفق ما بين الاثنين هو هيبقي مرهق شويه بس عدي بس انت و خلص  كليتك و ربنا يعينك و يوفقك و يقويك يارب

Watermelon_69433 🇰🇼 · Answer

كمل فى الماكتنج زي ما انت وظبط امورك فى الكليه بحيث تنجح

Chilli_71915 🇪🇬 · Answer

موضوع المايندسيت بتاع هندسه ده انا شربته كتير لاني بقالي ٤ سنين فيها و،لسه ٢ 😂 ..... بس ضغط صعب اوي يعني و تعقيدات ملهاش لازمه

Jackfruit_61164 🇪🇬 · Answer

هتطلع والله مفيش حاجه هتقف قدامك لو عديت بالكلام ده