، معلش لو البوست ممكن هيكون طويل حبتين بس سامحوني انا بس محتاج رأيكم بس بدون تجريح اذا تكرمتم ، انا دكتور خريج و كنت بروح الكلية بخلص كام حاجة من فترة و شوفت بنتين عجبوني جدا بالصدفة و قررت بصراحة اتقدم لواحدة منهم اللي سهل اوصلها انا بجد سالت على الاتنين و سمعت كلام كويس و بالفعل حاولت اوصل لواحدة منهم لاني معرفتش اكلم ولا واحدة منهم فالكلية ساعتها و كلمت حد من معارفها اللي وصلتله المهم قالي هرد عليك و قعد فترة و اختفي و مردش قولت خلاص كده ، بعدها حاولت اوصل للتانية و وصلت لوالدها على طول و روحت قابلتها في بيتهم المهم في المقابلة دي البنت كانت متاخدة كده و متوترة و حسيتها مش موافقة او مش عاجبها الحوار ، بعد ما خلصنا كلام لقيت باباها و مامتها جم و قعدوا يتكلموا معايا كلامهم للاسف كان كله في الماديات و مرتب شغل الصبح كويس طيب شغل بليل كويس ! احنا دايما دماغنا في الاستثمار و مامتها تقولي ابني برضو كل ما يبقي معاه فلوس بيحتار يعمل بيها ايه احنا كلنا نفس التفكير و حكولي انهم رفضوا جوز بنتهم مرتين زمان بسبب موضوع الشقة انه هيجيب شقة في منطقتهم عشان البنت تبقي جمب مامتها و هما رفضوا قالوا لا انا عاوز شقة تليق ببنتي انا بنتي دكتورة و انت محاسب هات شقة في مكان عليه القيمة و تعالي ( مكانهم شعبي جدا و مش راضيين عنه ) مع انه المفروض هيتجوز و هيرجع بيها السعودية ، و طلبوا مني في اول قعدة دي انهم يشوفوا الشقة و احدد معاهم ميعاد يجوا فيه يشوفوا الشقة انا طبعا استغربت لان دي اول قعدة لسه و معرفوش عني اي حاجة حتي اسمي بالكامل لغاية دلوقتي ميعرفهوش و لا سالوا عني و لا حاجة و فضلوا يتكلموا عن الشقة و يسالوني عن المساحة و الدور و في اسانسير و لا لا و فوقيها كام دور و هل شعبيات زي المكان هنا و لا ايه حسيت ان ده كل همهم ، المهم و والدها بيوصلني بعربيته تحت - (هما ساكنين في منطقة شبه مقطوعة و كلها شعبيات مش عجباهم هما نفسهم اصلا و لكن ده لا يعنيني - ) و باباها قالي انه رفض عريس بنته التانية مرتين بسبب موضوع الشقة انه جوزها قال لباباها انه هيجيبلها شقة في منطقتهم عشان تبقي جمب مامتها قاله لا انا مش عاوزها جمب مامتها هاتلي شقة تليق ببنتي انا بنتي دكتورة و انت راجل محاسب حاجة تبقي واجهة ليكم موافقش عليه غير لما راح جاب شقة في مكان كويس و وضبها ع كلامه يعني ف ٣ اسابيع لانه كان ماشاء الله شغال في السعودية و عايش هناك و كده و هياخدها و يسافر بيها انا اتوترت شوية م الكلام لان حسيت اهتمامهم بالغ اوي بموضوع الشقة و انا شقتي معقولة مش واو بس كويسة جدا الحمد لله و في مكان كويس بالنسبة لوضعي الحالي، و والدها بيوصلني فضل يتكلم و انا بسمعه ، لقيته بقي بيتكلم و يقولي بالنسبة للشبكة فدي هدية العريس لكن احنا هنكتبلها زي ما اتكتب لأختها ( في القايمة يعني ) اتكتب لدي ب ٥ قروش هنتكتب لدي ب ٥ قروش عشان البنات متبصش لبعض !! انا طبعا بسمع الكلام و مش مبسوط خاالص لانكم مش هاممكم اخلاقي و طباعي و ديني كل الكلام بيدور حوالين الفلوس و بس ، طبعا روحت البيت و قعدت مع اهلي و قولتلهم لا انا مش هكمل و البنت شكلها مش موافقة كده حسيت و راجع مقبوض كده ، تاني يوم لقيت باباها بيكلمني الظهر بيقولي في قبول بنسبة ٨٠% عايزك بس تبعتلي لوكيشن الشقة و نحدد يوم كده فاضي فيه نيجي نشوف الشقة مع بعض ( و كل ده ميعرفوش عني و عن اهلي اي حاجة ) رديت عليه بصراحة قولتله مش شايف حضرتك انه لسه بدري على الكلام ده الشقة و الماديات و الحاجات دي بعدين يعني خدني في دوكة فالكلام ان الشقة دي بتثبت المصداقية و الشقة دي من عوامل الشخصية برضو و كلام كده مش مفهوم و برضو عاوز يشوف الشقة قولتله طيب هشوف و اكلمك حاضر لكن انا مش مقتنع اوريهم حاجة و لا اكمل و في نفس الوقت مش عايز افكس لاني برضو عاوز اتجوز و وصلت ٣٠ و جاهز مش ناقصني حاجة الحمد لله بس عشان اشوف الحوار للاخر و مندمش لاني جربت كتير و مفيش حاجة بتتم ، المهم في الحيرة و التفكير ده قولت هوريهالهم و خلاص و خليني للاخر و كلمته قولتله نتقابل بكرة تشوفوها قالي لا عندنا مشوار خليها الاسبوع الجاي و بصراحة قولت خلاص كده انا عملت اللي عليا مش هكلمه تاني انا حددت ميعاد و مناسبهمش ----> التقيل بقي اللي جاي ----> و انا وسط الحيرة دي إذ فجأةً يرد عليا قريب البنت الاولانية بعد شهر كامل و بعتلي رقم باباها عشان اكلمه و التاخير بحجة الانشغال و بتاع ، طبعا واحد في موقفي ده مش هيتردد يشوف التانية دي بتقول ايه و لا هيحصل ايه خصوصا انها كانت محترمة و حافظة للقرآن و كانت بتنزل فيديوهات بتشرح للناس احكام القران و كده يمكن عشان كده كنت فكرت اكلمها هي الاول ، و شورت كذا حد قالولي خلاص امشي في الموضوعين و قرر - و دي كانت غلطة كبيرة للاسف - روحت قابلت ابو البنت دي و كان كويس و احترمني لكن حكالي ان البنت رافضة الفكرة و طول الشهر ده بيحاول يقنعها انه عايز يفرح بيها و بتاع قولتله الحجات دي مش بالاجبار مش عايزة خلاص قالي هي هتستخير و ربنا يسهل و حكالي ان ظروفهم المادية مش اد كده و لسه هيجهز يعني و البنت بتساعده ماديا و اتفقنا ان هيكون في مقابلة فالبيت معاها بقي كمان كام يوم ، بعدها لقيت ابو البنت بتاع الشقة ده بيكلمني هو انت نسيتنا و لا ايه ؟ اتحرجت قولتله طيب خلاص نتقابل الجمعة الجاية عند الشقة حسب اللوكيشن ، و انا ميعادي مع الاولي يوم الاربعاء روحتلها و يارتني ما روحتلها اقل ما يوصف ان اللي حصل معايا قلة أدب حرفياً و مفيش ادنى درجات الاحترام للضيف اللي قاعد و ده مش اي ضيف ده عريس المفروض ، البنت مش راضية تخرج من الاوضة و طلعوها بالزق من جوه و مبتتكلمش خاالص و ابوها و مامتها قاعدين وسطنا مش عايزين يسيبونا لوحدنا نتكلم شايفينه عيب !! قعدت اتكلم مع البنت طريقتها وحشة كده و في وسط الكلام بسالها انتي اصلا بتفكري في الموضوع ردت بصوت عالي و بنبرة عصبية كده لا بصراحة مش بفكر فسالتها طيب جبتيني ليه ؟!! اهو بستخير و ربنا يعمل الخير ، اكتر موقف حسسني بقلة الادب اللي اتكلمت عليها فوق دي هو اخواتها البنات و هما آنسات جامعيات مش اطفال انهم عمالين يكلموا البنت من تحت عقب الباب و هي ترد عليهم و يضحكوا و حسيت ان ابوهم شخصيته ضعيفة كده فانا حسيتهم مش مناسبين لا ماديا و لا اجتماعيا و لا اي حاجة فاانا مكملتش ساعة اصلا و مشيت مش لاقي كلام اقوله و القعدة في منتهي الرخامة ، نزلت برضو و كلمت اهلي طبعا مصدقوش اني خلصت بدري كده بس قولتلهم الحوار ده فشنك برضو و مش هكمل فيه لقيت باباها باعتلي تاني يوم كل شىء نصيب قولت كويس انها جت منك ، روحت قابلت التانيين الجمعة و وريتهم شقتي عجبتهم جم الاب و الام و البنت بعد ما شافوها بوصلهم لعربيتهم ماشي مع باباها لقيته بيكلمني ف ان البنت طموحة و مش عايزة تحس انها اقل من اختها ؛ اختها في السعودية و دلوقتي معاها شقة ف العاصمة الادارية و مستواها عالي و انت برضو دورلك على سفرية بره السنة هناك ب ١٠ من هنا و اهم حاجة عندنا الطموح و انا هشوف رايها لو تمام هقولك تشرفنا تقعد معانا قالت لا هقولك كل شىء نصيب و انت زي ابني و هجيبلك برضو ناس توضبلك الشقة باسعار كويسة و خد بالك بنتي دي دلوعة و آخر العنقود و كلام كده برضو مريحنيش ، المهم جت هي و مامتها ورا قالت البنت عجباها الشقة يلا اتفقوا هنتقابل الاسبوع الجاي عشان عايزة تتعرف ، المهم روحتلهم المرة اللي وراها و قعدت معاهم لقيت والدها في الاول بيتكلم معايا و سألني عن المرتب صريح الشغلين و التوتال كام كله فقولتلهوله قال ( انا قولتلهم ان مرتبه اكيد مش هيقل عن كذا كذا ) ، و انا هخدك بقي افرجك على منطقة ابني تتفرج على الشقق هناك عاملة ازاي انا افتكرت انه عايز يفرجني كده فبقوله ده مشوار بعيد قالي طب خلاص هاخدك و نروح نتفرج على الشقق اللي في المنطقة الفولانية ففهمت انه بيرمي اني اغير الشقة بتاعتي اللي عجبتهم دي بعدين و بعد شوية اخوها جه هو متجوز جه عشان يشوفني و يتعرف عليا و فضل يتكلم معايا و برضو سألني عن المرتب غلوشت ف الكلام عشان اهرب م السؤال راح رجعني ليه تاني مرضتش احرجه لاني لسه مجاوب من شوية عالسؤال ده و مش من حقه يسال عن حاجة زي كده بس حسيت ان هما اللي زقينه يسال كده ، و باباها شغال انا بنتي دلوعة و هي تقول انا بحب الدلع و يقول عايزكم بقي بما انكم دكاترة كده و معاكم مرات ابني تفكروا تفتحوا مستشفى مع بعض او مخزن ادوية كبير و احلام يقظة كلها ، و يقولي انت برضو لو معاك فلوس استثمرها مسيبهاش كده ، و ماماتها بتقول ان جوز بنتها بتعتبره زي ابنها راح باباها قال بنبرة كده تقلق كأنه بيلحنها ( اللي بيخش وسطنااا بيبقي مننااا ) ، المهم سابوني أقعد مع البنت بصراحة كانت لذيذة اوي اوي المرة دي و عجبتني جدا كلامها و شكلها و الاستايل بتاعها و حسيتها متقبلة الحوار كده بس لقيتها قلقت من كام نقطة من كلامي منهم نقطة الغيرة بتقولي انا مش بحب الغيرة الاوڤر و حسيتها قلقت كده لما قولتلها انا غيور جداا ، بعد ما مشيت باباها بيوصلني كلمته في اللي قالهولي قبل كده يعني ايه البنات بتبص لبعض دي !! و حضرتك كلمتني في القايمة من اول مرة و قبل ما تشوف اهلي و عرفته ان انا مش هجيب و لا هكتب حاجة الا اللي في مقدرتي حسيته ارتبك من كلامي كده و قالي ده كلام حبر على ورق ( هو كتب ٧٠ جم دهب يعني مش حاجة ) - طبعا وقت ما بنته اتجوزت مكانوش ساعتها فعلا حاجة لكن دلوقتي لا طبعا - و قولتله انا موعدكش اني هكون زي اختها و جوزها كل واحد ليه رزقه قالي اكيد عارف هو انت هتجيب نفسك زيهم لكن احنا اهم حاجة عندنا الطموح لو ملقتش في عندك طموح هقولك خلاص كده ، قولتله الشقة انا بصراحة مش هحب اغيرها انا شايفها كويسة و انتي قولتوا كويسة ( و الا مكانوش كلموني اجي تاني ) و المكان هناك بحبه و فيه ذكرياتي رد عليا قالي لا الذكريات دي بتاعتك انت ، الشقة بتاعتك برضو فيها كذا و كذا (قعد يذكر كام حاجة معجبتوش) ، طب انتوا لما مشيتوا من مكانكم القديم قعدتوا هناك اد ايه قالي ٤ سنين طبعا مصدقتوش ( و لو هو طموح اوي كان راح مكان افضل من الحالي بكتير ) ، بعدين اتكلمنا تاني عشان نعرف ايه الخطوات اللي بعد كده وصلنا اننا هنوقف مقابلات و هيخليني اكلمها فون عشان هما مسافرين بره زيارة و سالني ( انا دلوقتي عايز اعرف مقدرتك !! ) بيقولها باسلوب كده حسسني اني مضيع وقتهم و داخل خارج عليهم كده و قالي ان البنت لسه بتفكر و لو مرتاحتش هقولك كل شىء نصيب و هنرجعلك الشوكولاته بتاعتك تحرم علينا يا اما هديك فلوسها او اقابلك في اي حتة اديهالك ( استغربت انه بيتكلم ف حاجة زي كده اصلا ) قولتله عيب يعني ده حقكم طالما دخلت بيتكم قالي لا انا عملت كظه مع جوز بنتي التانية عادي ، و كلمت البنت ناقشتني في كام حاجة تاني قلقانة منهم بس كانت بتسالني بصوت مقطع كده كانها مترددة او حد زاققها تسال ع كام حاجة اولهم موضوع الغيرة ده تاني مش عايزاني اغير اوڤر و انه يكون في ثقة كانت قلقانة من النقطة دي و بعدها موضوع الذمة المالية انه يعني فلوسها لوحدها و ثالثا كلمتني في موضوع اني ليه مجبتش عربية بتلمح لكده عشان هي بتدوخ في المواصلات و متعودة يكون في حد يوصلها دايما و رابعا موضوع انها دلوعة زي ما ابوها قال سالتني بالنص كده ( هو انت اتضايقت لما بابا قالك ان انا دلوعة ؟ ) و اخيرا موضوع انهم في العيلة متعودين يعملوا خطوبات في قاعات مش عالضيق فالبيت زي ما المعظم بيعمل، انا خدت الكلام و فكرت فيه بس مردتش لسه ، المهم لقيتها ابتدت تتعلق شوية بالموضوع و تبعتلي هيا و مكنتش لسه ضيفتها عالفيس بس كانت بتدخل عندي على طول تراقبني و تقولي ع حاجات كل شوية عالاكونت و تقولي انا بحب الكلام معاك عموما بس لسه مترددة عشان حاسة الحوار و خطوة الخطوبة نفسها كبيرة و اتكلمنا مرة كمان في التليفون و انا بصراحة بدأت اتشدلها و بعد كام يووم لقيتها شالت صورتها م الواتس و بعدين بعتلها مالك ؟ قالتلي مسحت رقمك ، طيب لييه ؟ ، قالتلي عشان حصل حاجة مكنتش صريح معايا فيها ( و هنا كانت الكارثة ) انها كانت خارجة مع صحابها و كان من ضمنهم البنت التانية اللي كنت متقدملها و اتضح انها صاحبتها و بتخكي اني متقدم من فرحتها بالموضوع و صاحبتها دي حكتلها كل حاجة و ازاي حاولت اوصلها و وسطت ناس يكلموها لاني للاسف كنت موسط نفس الناس يكلموا البنت دي بنفس الطريقة و اكيد شوهت صورتي عندها و اني واحد لعبي و بهزر ، فراحت بعتتلي ان كده الثقة كده منعدمة و مش هقدر اكمل و صعب ارجع تاني و نهت الموضوع من ناحيتها لاني اكيد في نظرها اللي اترفضت من صاحبتها المقربة و شكلها مش هيكون حلو بعد كده و انا بصراحة مردتش عليها و لا والدها كلمني ، فانا مش عارف اكلمها و لا اكلم والدها و لا اعمل ايه ؟؟ انا بصراحة ابتديت اتشد ليها بس قلقان شوية من اللي جاي لاني معرفوش ، هي منهتش معايا غير لما كلمتها يعني لولا كده كانت فضلت ساكتة و انا فاكر الحوار ماشي ز اللي عرفته مؤخرا ان اخوها ده طلق مراته و خطب واحدة تانية في اقل من شهرين و فرحهم كمان شهر و مستغرب ازاي ده حصل خطب و الاولانية لسه ف العدة بتاعتها ، انتوا تنصحوني بايه احاول تاني و لا خلاص كده و ابعد ؟ انا في حيرة شديدة من امري ، ساعات بحس اني عايزها و ساعات بحس اني قلقان ؛ قلقان يضغطوني بعد الجواز و يكونوا بيبصوا لغيرهم فعلا و ميرضوش بعيشتها معايا قلقان من طلباتهم و من اهلها حجات كتير قلقاني بس الفكرة كلها اني اتعلقت بالبنت و عجباني كشكل و شخصية و روح و بحسها ع نياتها بس اهلها اللي قالقني ، و بسال نفسي لو هما مثلا وحشينو انا مرجعتش هي كده مش هتتجوز مثلا طب مهي اختها متجوزة اهو و اكيد جوزها اتعرض لنفس اللي بشوفه و بسمعه ده .. منتظر ردكم و اسف اوي اوي اوي ع الاطالة و الله غصب عني بس انا محتار

3

8