العيب فيا أنا… يمكن أنا اللي شخصية متتحبش. يمكن فيا حاجة مش واضحة ليا، بس بتبان للناس التانية وتخليهم يبعدوا. طول عمري بحاول أكون مختلف، أكون حقيقي، أدي من قلبي من غير حساب، بس النتيجة في الآخر إن محدش اختارني. ومحدش شاف فيّ الشخص اللي يستاهل يتعاش معاه عمر. يمكن اللي واجعني مش بس إني ما اتحبتش، لكن إني كنت فاكر إن الحب هيكون طوق النجاة، وهيغيّر إحساسي بنفسي. كنت متخيل إن أول مرة هلاقي اللي يقدرني، كل الوجع هيذوب. بس اللي حصل هو العكس… اتكسرت جوايا حتة عمري ما توقعت إنها تتكسر. علشان كده جبت الدبلة. دبلة في إيدي اليمين مش علشان ارتباط، ولا علشان شكليات، لكن علشان تفضل قدامي دايمًا علامة. كل ما أبص لها أفتكر الوَكسة… أفتكر اللحظة اللي اكتشفت فيها إن مفيش حب ليا. هي مش زينة، هي جرح ملموس، معدن صغير ماسك في صباعي، لكنه شايل حكاية كبيرة. يمكن حد يشوف الموضوع غريب، أو يضحك على فكرة إني ألبس دبلة علشان أفتكر إني ما اتحبتش. لكن أنا شايفها أصدق حاجة عملتها لنفسي. زي وشم بس من غير حبر. زي عهد مع نفسي إني ما أنساش. ما أنساش إني اتكسرت، وما أنساش إني لو قمت من الوجع ده في يوم… يبقى أنا أقوى بكتير مما توقعت. يمكن أنا شخصية متتحبش…

1

3