فيه بشر بطبعهم شخصيات معطاءة، لما بيحبوا بيدوا من غير حسابات ولا بيفكروا هما بياخدوا إيه وأد إيه في المقابل.. قليلين لكن موجودين، وعادة العطاء ده بيكون مرتبط بدرجة كبيرة من الحساسية بتؤذيهم جدًا أكتر من أي مخلوق غيرهم؛ يمكن لأن العطاء بيهذب نفس صاحبه وبيخليه أكثر رقة.. بيكونوا قادرين يركزوا مع حاجات صغيرة بالنسبة للي بيتعاملوا معاه غالبًا بتكون تافهة.. بسبب حساسيتهم ورهافتهم بتكون نظرتهم للأمور مختلفة شوية، وعلى قدر الطيبة بيكون غضبهم من اللي قدامهم غضب صادق وعميق وصعب يتراجعوا فيه، وبيتقال عليهم أحيانًا "بيّاعين"، بس محدش بيحاول يفهم اللي ورا التصميم ده في البُعد.. عندي صديق كده، وعمري ما هنسى حُرقته لما سألته ليه بطّل يكلم شخص معين أنا عارف إنه كان مُقرَّب منه.. وإزاي فضل يحكيلي إزاي وأد إيه كان بيحاول يقف جنبه، وإزاي كان بيلاقي المقابل عكس ده تمامًا لما كان بيحتاجه، وإنه كان بيحاول يكدب نفسه في الأول عشان بيحبه بس خلاص زهق، ووجعه من إنه حاسس إنه تم استغلاله.. غضب حقيقي متصدقش إنه يطلع من نفس الشخص المعطاء الخدوم البشوش اللي كل اللي عرفوه بيحلفوا بتهذيبه.. وإن كانت المعادلة بالنسبالي مفهومة: على قدر عطاءك غير المحدود، على قدر مرارة إحساسك بالظلم والمرارة لما متلاقيش تقدير حقيقي للي كنت بتقدّمه بكل رضا.

5

1