عايزة احكي تجربتي مع عدم الثقة في النفس..انا مكنتش بثق في نفسي ابدا حاسه دائما أن شخصيتي وحشه و شكلي وحش و كنت بكره اتصور و لو اتصورت بيبقى غصب عني علشان مبينش اني مش بحب شكلي بس كنت بكره اشوف الصور كمان كنت بحس دائما اني ضعيفه و غبيه و مستحقش اي حاجه حلوه ولا استحق اتحب ولا استحق صحاب كويسين فضلت كده لحد ما بقى عندي ١٧ سنه بالظبط بعد ما خلصت ثانويه عامه و للأسف مجبتش مجموع و ساعتها فضلت زعلانه و ساكته و مش عايزه اكلم حد ولا اتعامل مع حد بعيط وبس لمده اسبوعين و من هنا قررت أن انا مش هينفع اكمل حياتي بالشكل ده و هعتبر المرحله الجديده دي في حياتي و هي الجامعه بدايه جديده و هبقى شخص جديد احسن و فعلا بدأت اشوف مشاكلي و احلها زي اني مستحقش الحب بدأت اشوف هو انا ليه حاسه كده هل علشان انا انسانه وحشه لا انا مش وحشه طيب علشان ايه اكتشفت أن الموضوع بدأ من عند اهلي من وانا صغيره بيتريقوا عليا و مهما عملت شايفني فاشله..بدأت انا ادي لنفسي الحب اللي محتاجاه و اشوف اني فعلا شاطره و ده بشهادة اللي حواليا كمان...من ناحيه بقى اني وحشه بدأت اهتم ببشرتي و اجيب منتجات اسكين كير وكده، عرفت الميك اب اللي بيليق عليا، غيرت استايل لبسي، غيرت لفة الطرحه، بقيت اشوف مشاكل بشرتي و اعالجها، خدت بالي أن عندي نص وش اتخن من التاني بدأت اعمل تمارين الوش و اعالج الموضوع ده، اتعلمت ازاي اتصور و عرفت أن نوع التليفون بيفرق برضو ممكن كاميرا الموبايل وحشه اصلا و الحمدلله بقيت بتصور، بقيت احسن و طاقتي و احساسي بنفسي احسن و بقيت واثقه في نفسي و لسه أن شاء الله هبقى احسن في حاجات تانيه كتير كمان اهتميت بدراستي و مذاكرتي و اثبت لنفسي اني شاطره فعلا....الموضوع مش سهل انا فضلت حوالي سنتين و مؤخرا بس بدأت أحس بتغيير بس صدقوني الموضوع يستاهل و كل خطوه صغيره هتعملوها دلوقتي هتفرق كتير بعدين

والله انتي مش متخيلة قد إيه أنا مبسوط لك بجد ربنا يوفقك و تسلمي علي مشاركتك و ربنا يوفقك آكتر و آكتر و ركزي ف نفسك بس و ساعد غيرك و قربي من ربنا مش هتفدي لحاجة تاني و المكتوب جاي لا محالة ف عيشيها بسعادة و آخر حاجة انما الدنيا صبر ساعة وربنا يرزقنا كلنا الفردوس يارب 🤲🤲❤️

ازاي أبدأ براند هدوم خاص بي؟ خطواتي وتجربتي

Q: الخوف مش ضعف.. ازاي نتحكم فيه عشان ميكونش ضرر؟

بقيت بحسد الناس الي عندها خوف خصوصا خوف من الفشل فا بيخليها دايما بتحاول خصوصا في الدراسة لما بمشي في الكلية ببص لكل الي حواليا لدوافعهم للاستمرار بلاقي الدافع بتاعهم انهم خايف يشيلو مواد عشان الناس متنظرش ليهم نظرة الفاشل او يحسو انهم مش كفاية بالنسبة لمعاير المجتمع فا عندهم خوف بس بيحركهم يكملو وانا مش بقول كلو كدا طبعا لا لاكن انا بالنسبة ليا كل الي هما خايفين يحصلهم حصلي وكل الي خايف منو حصل فا لا بقيت بخاف ولا بقيت مبالي احساس الخوف مش دايما سئ دا ممكن يكون سبب من اسباب اننا عايشين لان احنا بنخاف ان الحاجة دي ممكن تضرنا فا بنبعد عنها متحطوش فكرة الخوف في الإطار السئ دايما او ان الخوف ضعف الفكرة بس اننا نتعلم ازاي نتحكم فية عشان ميكونش ضرر لينا ودي حاجة اتكتب فيها كتب