محتارة بين طب بشري وحقوق.. ده تعبني!

Question

لو أنا مُخيره بين طب بشري خاص 
وحقوق (أنا الي عايزه حقوق )
اعمل اي واختار اي 
طب بشري اهلي الي عايزينه عشان بيقولو حرام ابقي شاطره وتضيع مستقبلي في حقوق 
وحقوق أنا عايزاها عشان اقدم نيابه بعدها بس طبعا التقديم مش مضمون اني اتقبل فيه 
بس انا فعلا عايزه ادخل حقوق جدا وخايفه متقبلش بعد كدا في نيابه اكون ضيعت عليا فرصه اني ابقي دكتوره

Apple_67479 🇪🇬 · Accepted Answer

بصي اختاري الاريح الي قلبك و صلي استخارة و شوفي ربنا عايز اية و اتكلي ع الله مهم تكون مقتنعة بختيارك

Mango_67366 🇪🇬 · Answer

انتي تتجوزي

Coffee_68164 🇪🇬 · Answer

اختاري إللي بتحبيه وهتعرفي تنجحي فيه مفيش حاجة اسمها حرام ابقي شاطره واضيع مستقبلي في حقوق مستقبلك هيضيع برضو لما تخشي حاجة مش بتحبيها لأنك مش هتعرفي تنجحي فيها .

Tofu_19483 🇪🇬 · Answer

صلي استخاره وادعي ربنا يختر لك ولا يخبرك وشوفي قلبك هيتطمن ناحية ايه أكتر واللي قلبك يتطمنله ادخليه وادعي ربنا يختر لك الخير ليكِ ف دينك ودنيتك

Carrot_68158 🇪🇬 · Answer

بلاش تضيعي فرصتك انك تكوني دكتواره وخليكي في الطب افضل

Carrot_68158 🇪🇬 · Answer

وبرضو صلي استخاره

Kiwi_66691 🇪🇬 · Answer

والله كونك تكونى دكتورة برضه مستقبل واضح و كبير بس الاهم انك تكونى مقتنعه به طبعا المستقبل هنا او هنا بإيد ربنا وتوفيقه انا الحقوق لو انتى واثقة تدخل النيابة يكون افضل من الطب بس انتى عندك اللى بوصلك لده

Kiwi_66691 🇪🇬 · Answer

واضح أن الجميع ارتضى لكى صلاة الاستخارة عارفه تصليها ازاى

Pineapple_59087 🇪🇬 · Answer

ممكن تدخلي طب عادي جدا وحقوق بعد ما تخلصي طب وساعتها ممكن فرصتك في القبول احسن في النيابة علشان ساعات بيحتاجوا ناس متخصصين في الطب علشان بيفصولوا في حاجات عمليه أو قضايا طبيه 
واه بالمناسبة ممكن برضو بعد الطب تاخدي الموضوع بشكل أكاديمي

وممكن تقريبا تاخدي دبلومه أو ماجستير يجمع بين الاتنين

Watermelon_66850 🇪🇬 · Answer

طبعا اولا صلي استخارة ثانيا انا كنت بمر بنفس المشكلة دي وأهلي كانوا عايزيني ادخل زراعة علشان ابقي مهندسة وانا كنت عايزا ادخل اداب علم نفس وانا علمي وكنت جايبة ٩٠ في المية وكانوا شايفين ان دا جنون بس صليت استخارة ودخلت اللي بحبه واكتشفت احلي مجال في الدنيا ودلوقت بشتغل في مركز تخاطب وقدامي تدريب في مستشفيات وحاجات كتير الحمدالله

Watermelon_66850 🇪🇬 · Answer

اللي عايزا اقولهولك ان احنا مش بنقرا الغيب علشان نقول الكلية دي ليها مستقبل ولا لاء المستقبل دا في ايد ربنا وحده ثم بإجتهادك 
اختاري اللي ترتاحي ليه لأنك انتي اللي هتلبسي في الاخر محدش هيذاكر مكانك ولا هيشتغل مكانك ودي حياتك انتي وعادي لو اخترتي اختيار واكتشفتي انه مش مناسب علي الاقل هتبقي خرجتي من الحيرة وعرفتي ايه المناسب ليكي والحياة قدامك جربي براحتك 
وربنا يوفقك بإذن الله♥️

Blueberry_62794 🇪🇬 · Answer

بصي الدكتورة حاجه كبيرة مفيش كلام . وحقوق فرهدة . بس لو الاهل عايزين اللقب مش المهنه . عادي ادخلي حقوق اعملي ماجيستير ودكتورة في القانون .

Chilli_67202 🇪🇬 · Answer

بصي انا دكتور جراحة عظام عندي ٢٨ سنة ، نصيحتي ليكي لوجه الله ، اوعي تدخلي طب و انتي مش حاباها ، الطب مفرمة طاحنة و هلاك للي بيدرسه او بيشتغله ، مفيش اي مقابل نهائي ، الحاجة الوحيدة اللي تصبرك عليه لو بتحبيه اوي ف تكوني مستمتعة وانتي بتمارسي الطب.
لكن غير كده ابعدي عنه.
انا بدور ع اي مهنة تاني مناسبة عشان اسيب الطب.