لو بتعاني مع أهلك فتعالى بس أوريك مستوى النقاشات بيني وبين أمي في حتة عمرك ما هتتخيليها .. من حوالي تلاتين سنة كدا أمي كان بتولد أختي الصغيرة وأبويا في الشغل .. فطبيعي ان أمي ما تعملش أكل لأبويا .. فجت مين بقى ؟ برافوا عليك .. مرات عمي اللي معانا في نفس البيت لأننا كنا أرياف ساعتها .. وعمل لأبويا الغدا بدل أمي .. عملت إيه بقى ؟ بسلة ورز وفراخ .. ولو ما تعرفش معاناتي مع البسلة لازم تعرفها .. وهي إني مش بحب في البسلة بالصلصة دي غير الجزر والبطاطس اللي مع البسلة .. فلما رجعت من المدرسة وأنا كنت وقتها صغير ولقيت الحلة في المطبخ وأمي تعبانه وبتاع .. نقيت كل البسلة على جنب في علبة ورميتها باين او حطيتها فين مش عارف .. وخليت الصلصة بتاعة البسلة دي جزر وبطاطس بس .. يقوم يجي أبويا وكان عصبي عصبية غير مبررة ويلاقي الصلصلة (الدمعة) زي ما كان بيقولوها مافيهاش بسلة فينزل يشتكى لعمي اللي كان مخه تعبان .. فيروح يتخانق مع مراته .. والست مرات عمي دي غلبانة والله .. اتظلمن بسببي .. الحوار كبر أوي فهي ردت على أبويا فعمي قام رامي عليها طلاق .. تقوم أمي تقولي واد ياحمد هو انت كلت البسلة .. مرات عمك اتطلقت .. وواحدة واحدة جرجوني فاعترفت بس اعترفت اني كلت البسلة ما نقتهاش .. لأني خفت أقول رميتها اتضرب اكتر .. لتبدء رحلة طفل صغير حياته كلها تدور في فلك ( احمد بسلة) اللي مرات عمه اتطلقت بسببه .. لك ان تتخيل المعاناة .. يخلوك تحب حاجة انت أصلا بتكرها .. الحمدلله عمي رجعها .. بس رجعها بعد ما ابويا عدمني العافية وكان كل عم من اعمامي يشوفني يضربني .. يابن الكلب بتنقي البسلة بس تاكلها ؟ يقوم إيه .. مرتات أعمامي يشوفوني بتضرب يعملوا ليا بسلة سادة .. سادة يا مؤمن متخيل .. وينادوا عليا يقولوا كل يا حبيبي ما تزعلش .. سادة أهي زي ما بتحبها .. ولو رفضت يقولولي عمك ولا أبوك لو عرف هيضربوك .. فبضطر أكل وأنا بعيط وهما يفتكروا اني بعيط لأني بحبها يا عيني .. وأنا يا جماعة ما بحبش البسلة .. واتحطيت قدام الأمر الواقع قدام عيلة أبويا إني أحمد بسلة .. أحمد اللي بينقي البسلة والكلام عما بيوصل من حد لحد خلوها اسطورة .. حتى في الأعياد الناس كلها تبقى معزومة على كفتة رز ومحاشي وهما عاملين ليا رز وبسلة خضرا سادة .. بعد تلاتين سنة أهو فاض بيا ومليت .. ولقيت أمي عامله بسلة سادة ليا مخصوص .. فبعترض لأني زهقت والله أخبي الموضوع ده في قلبي .. وقلت لأمي انا ما بحبش البسلة ما بحبهاش .. وعمري ما حبيتها .. واتعصبت وزعقت لأنها بتقنعني اني بقالي تلاتين سنة باكلها صبح وليل .. وبتقولي انت من امته ما بتحبهاش ده انت بتعشقها يابني ده مرات عمك اتطلقت بسببك .. فأمي كلمت خالي اللي الله يصلح حاله جالنا البيت ومعاه شيخ يقرأوا عليا .. بيقولها انا مش قلتلك تجوزيه لأي واحدة.. شفتي أخر دلعك ايه .. بعد ما طلق مرات عمه جاي يقولك ما بحبهاش دلوقتي .. الشيخ قاعد يقرا كلوا من طيبات من رزقناكم واشكروا لله ان كنتم إياه تعبدون .. وأمي قاعده جنب الشيخ وهو بيقولها والله ياحجة هنجوزهولك .. فبتقوله وهو فيه واحده هتاخده وهو ما بيحبش البسلة ..

4

0